Partia Demokratike ka kthyer përgjigje për propozimin e ndihmës-sekretares amerikane të shtetit, Victoria Nuland për reformën në drejtësi. Përgjigja e demokratëve përcakton përfundimisht pozicionin e tyre për sa i përket procesit të Vetting-ut.
Lapsi.al ka siguruar të plotë propozimin e ri që PD ka dorëzuar.
Për aplikimet PD kërkon që thirrja të shpallet nga Avokati i Popullit për 3 kategori pozicionesh në strukturat e Vetting-ut; a) Komisionerët, b) Komisionerët Publikë dhe c) gjyqtarët e Dhomës së Apelit.
Avokati i Popullit harton listën e kandidatëve duke përfshirë pa përjashtim ccdo kandidat që ka aplikuar, pavarësisht plotësimit ose jo të dokumentacionit dhe ia dërgon listën kuvendit. Ky proces zhvillohet me monitorim të Operacionit Ndërkombëtar të Monitorimit (ONM).
Këto kandidatura shqyrtohen më pas nga Komisioni Ad Hoc i kuvendit. Në këtë fazë përcaktohet edhe roli i Operacionit Ndërkombëtar të Monitorimit.
KOMISIONI AD HOC
Kuvendi krijon 2 komisione ad hoc, një me 12 anëtarë dhe një me 6 anëtarë (në të dyja rastet përbërja është 50% – 50%).
Komisioni me 6 anëtarë shqyrton kandidatët dhe verifikon përmbushjen e kritereve të shpallura për kandidim.
Komisioni ka të drejtë të marrë vendim (që përbën akt administrative) të bazuar plotësisht dhe vetëm në prova dhe ligj , për përjashtimin e një kandidati që nuk plotëson kriteret. Në fund të procesit të seleksionimit do të dalin 3 (tre) lista: (a) lista me kandidatët për komisionerë, b) lista me kandidatët për komisionerë publikë dhe c) lista me kandidatët për gjyqtarë);
ROLI I OPERACIONIT NDËRKOMBËTAR TË MONITORIMIT
Vëzhgues nga Operacioni Ndërkombëtar i Monitorimit kanë të drejtë të marrin pjesë në seancat e shqyrtimit të kandidatëve pa asnjë kufizim. Kjo trupë ka të drejtë të ketë akses të plotë dhe të papenguar tek çdo dokumentacion që administron komisioni. Gjithashtu, ONM ka të drejtë të dorëzojë pranë komisionit ad hoc dokumentacion që vërteton kushtet e ndalimit të ushtrimit të funksionit në përputhje me Ligjin e Dekriminalizimit dhe që nuk disponohen nga institucionet shqiptare. Pas përfundimit të shqyrtimit të kandidatëv nga komisioni ad hoc, ONM ka të drejtë t’i dorëzojë Kuvendit një raport të detajuar me vlerësim për secilën kandidaturë, sipas kritereve kushtetuese dhe ligjore dhe dokumentave dhe provave të administruara nga komisioni. Raporti i vihet menjëherë në dispozicion çdo deputeti.
Në draftin e zonjës Nuland, ndërkombëtarët propozohej të kishin edhe rol ekzekutiv. Lapsi.al ka mësuar se zonja Nuland ka pranuar edhe versionin e kryetarit të PD, Basha, që ndërkombëtarët të kishin vetëm rol monitorues, të pakufizuar, siç rekomandon Komisioni i Venecias.
Në propozimin e PD, që Lapsi.al po e boton të plotë, përcakton edhe fazat e mëtejshme të procesit të Vetting-ut. /Lapsi.al
