Opozita akuzon socialistët se po shmangin bërjen e lustracionit
Mes debatesh dhe akuzash, mazhoranca në Komisionin e Ligjeve miratoi në parim draftin e propozuar nga qeveria për “Hapjen e dosjeve të ish-Sigurimit të Shtetit”, ndërsa rrëzoi nismën ligjore të hartuar nga shoqëria civile, me mbështetjen e dy deputetëve Mesila Doda (PD) dhe Shpëtim Idrizi (PDIU). Relatori i dy nismave ligjore, deputeti Armando Subashi, tha se projektligji i paraqitur nga dy deputetët ka përplasje me vendimin e Gjykatës Kushtetuese të vitit 2009 dhe për rrjedhojë nevojiten disa ndryshime. Në këtë mënyrë, Komisioni i Ligjeve i bllokon rrugën procesit të shumëpërfolur të lustracionit dhe pranon draftin e qeverisë për të njëjtën çështje. “Duhet të jemi shumë të kujdesshëm, tha ai, pasi është shumë e rëndësishme që të dy ligjet të jenë në përputhje me Kushtetutën. Ligji 2008 bashkë me këtë të ardhur nga dy deputetët janë njësoj në përmbajtjen e vet mund të ndryshojnë vetëm në presje. Përpara kemi një vendim të Kushtetutës për shfuqizimin e këtij ligji në tërësi. Pra ligji i 2008-s është shfuqizuar. Ky projektligj bie ndesh me parimet kushtetuese”, tha Subashi. Por kjo pikë është kundërshtuar nga demokrati Genc Strazimiri, i cili theksoi se vendimi i Gjykatës Kushtetuese në 2008, “mund të them që është vendimi ‘Femi Abdiu’ dhe ‘Bamir Topi’, me të cilin pasardhësit e atij regjimi synojnë të fitojnë pafajësinë”, tha ai. Argumenti i Strazimirit është rrëzuar nga kreu i Komisionit të Ligjeve, Fatmir Xhafaj, i cili u shpreh se vendimi i 2008-s i Gjykatës Kushtetuese është mbështetur në mendimin e Komisionit të Venecias. “Vendimi i 2008-s i Gjykatës Kushtetuese është mbështetur në mendimin e Komisionit të Venecias. Ka dhe një gjë në ketë histori, PD 8 vjet në pushtet la të bënte një ligj të ri duke reflektuar mbi atë ligj”, tha Xhafaj. Në lidhje me projektligjin e sjellë nga qeveria, që është miratuar vetëm me votat e mazhorancës, Subashi ka theksuar se ky ligj thjesht parashikon të drejtën e informimit dhe se nuk ka gjetur element antikushtetues, por pavarësisht kësaj, ai shton se mund të ketë nevojë për disa rregullime. “Ky ligj thjesht parashikon të drejtën e informimit. Nuk gjeta element antikushtetues është në përputhje me standardet. Mund të ketë nevojë për disa rregullime në nene të ndryshme. T’i hapim rrugë, ta miratojmë në parim”, tha më tej Subashi. Gjatë diskutimeve, deputeti Fatmir Mediu u shpreh se ish të përndjekurit politikë kërkojnë që ligji të shoqërohet me lustracion. “Ligji që duhet rrëzuar është ai i qeverisë me qëllim rrëzimin e projektligjit të dy kolegëve. Ligji i qeverisë është vetëm informativ, pasi nuk pengon personat që kanë dosje të mos ushtrojnë funksione publike. Kemi një ligj për dekriminalizimin tani që do na detyronte që të krijonin një raport të ri mes politikes dhe qytetarëve. Unë kërkoj, mendoj që të mos e hedhim poshtë ligjin e kolegëve, por ta mbështesim”, tha Mediu. Ndërsa deputeti demokrat, Eduard Halimi, e ka vlerësuar si hipokrizi variantin e propozuar nga ana e qeverisë. Sipas tij ky projektligj është thjesht informues, ndërkohë që varianti i propozuar nga dy kolegët e opozitës parashikon largimin e zyrtarëve të lartë që kanë kryer barbari në komunizëm. “Nëse ne u themi qytetarëve vetëm mund të informoheni, pa i bërë gjë, atëherë kemi të bëjmë me hipokrizinë ndaj qytetarëve, me retorika boshe. Është njësoj siç po ndodh tani ku në administratë ka njerëz me rekorde kriminale”, tha Halimi. Drafti i qeverisë parashikon që procesi të bëhet nga Autoriteti i Informimit Publik, një strukturë me pesë anëtarë, që do të jetë në varësi të Kuvendit. Varianti i pranuar i qeverisë pritet të pësojë disa ndryshime jo esenciale gjatë diskutimit nen për nen.
