“Djalë ma të mirë nuk ka Kosova” kishte deklaruar me bindje të plotë një familjarë për të riun LM, ekstremistin i cili kishte postuar në profilin e tijë në facebook disa fotografi ku ai shihej duke i prerë kokën, një të riu tjetër, po ashtu musliman. Shumkush vrapoi të deklarohet në rrjetet sociale e sidomos në media se këtë njeri e konsiderojnë të çmendur, kriminel, njeri të ligë e deri edhe monstrum! Madje, kështu vepruan edhe shumë nga ata që me debatet e tyre në emër të islamit e frymëzuan një formë të tillë lufte për fenë dhe shoqërinë.
Në anën tjetër, i bindur se ka të drejtë, “djali më i mirë prej krejtve” prerjen e kokës e sheh si veprim krejtësisht të arsyetueshëm. Tradhëtia ndaj bindjeve të tijë ashtu shpaguhet! Madje kërcnon se edhe në të ardhmen, gjithë tradhëtarëve të islamit do t’u pres kokat. Pa gjygj! Tradhëtari s’ka të drejtë as të mbrohet!
Kështu mediat vendore dhe ndërkombëtare e fituan armikun publik nr.1!
Të gjitha krimet e tjera relativizohen. Punë e madhe se qeveria ka vjedhur miliona! Punë e madhe … për gjithçka tjetër!
Por, a është ky njeri vërtetë djali më i mirë apo më i keq prej krejtve? Apo është veqse edhe një idealist tjetër që ka përqafuar verbërisht një ide e cila se ka për gjë që në emër të zotit, të kryej veprime të cilat bien ndesh me normat civilizuese që civilizimi ynë i njeh si të pranueshme?
Kush është kush në këtë luftë? Muslimanët nga e gjithë bota jan mbledhur në Siri dhe po luftojnë e po vriten në mes vete, për islam. Tashmë është bërë e qartë se të gjithë ne të cilët me rastësi, pra me të lindur, apo me vetpërcaktim jemi të besimit musliman, nëse mendojmë ndryshe për këtë çështje … jemi në rrezik! A ka liri mendimi dhe shprehjeje ?
Një Xhordano Bruno musliman nuk do të kallej në turrë të druve, tani do t’i pritej koka, e një Galileo do të mohonte shkencën e vet, do të konvertohej dhe paguante takse, edhe pse në fund do të klithte: “Megjithatë sillet”!
Alternativa për qytetarin vështirë se mund të quhet e tillë! Ku vullneti i qytetarit e ku vullneti i Zotitt?!
Veçse në emër të qytetarit sot flasin deputetët e në emër të Zotit flasin dijetarët dhe imamët!
Duhet zgjedhur mes fjalës të cilës nuk i besohet (deputetit) dhe fjalës të cilën nuk ke qare pa e besue! A është zgjedhje?
Kjo tregon, se është mbërrijtur në një udhëkryq civilizues, ku koncepte të ndryshme, të vërteta të ndryshme rreth fesë dhe rolit të sajë në shoqëri, sidomos islamit, po luftojnë për xhematë! Për pasues! Islami tradicional për të cilin janë kap me panik ideologët e hutuar, nuk ofron zgjidhje!
Islami nuk është më çka ka qenë! Nuk është më tradicional, por as modern nuk mund të quhet!
Në fakt, islamistët e rinjë e luftojnë atë çka ndër ne nënkuptohet me modernizëm. A ka në të vërtetë luftë në mes islamit tradicional dhe atij politik?
Vështirë të thuhet se islami tradicional paraqet ndonjë alternativë për të qenë! Sepse Islami tradicional te ne ishte po aq politik sa edhe ky i “riu”. Hoxhollarët e moqëm dhe bashkësitë fetare, ishin në një bashkëpunim të afërt me shtetin dhe ideologinë zyrtare dhe ndiqnin mardhëniet e drejtuara nga ideja e jugosllavizmit dhe socializmit, ndërsa jashtë ndiqnin politikën e mosinkuadrimit. Pra ishin krejtësisht të instrumentalizuar! Të tri këto drejtime, tashmë janë rrugë qorre! As jugosllavizmi, as socializmi e as mosinkuadrimi janë rrugë të cilat nuk qojnë askund!
Ajo që realisht po zhvillohet ndër shqiptarët, por edhe boshnjakët në Ballkan, kryesisht është lufta në mes dy koncepteve kryesore rreth rolit të fesë (islamit) në shoqëri! Në njërën anë është koncepti europian ku feja është çështje private e qytetarit, e ku specifikohet edhe ndarja e plotë e sajë prej shtetit. Ky sistem funksionon në bazë të vullnetit të qytetarve të shprehur me votë të lirë!
Në anën tjetër të barrikadave është koncepti i islamit politik i cili sidomos ndër shqiptarët mohon kombin dhe simbolet kombëtare, rrahë me shuplakë Skendërbeun dhe mohon humanizmin e Nënës Terezë vetëm se ajo nuk ishte muslimane. Propagojnë një islam të angazhuar globalisht, angazhohen që të zëvendësojnë vullnetin e qytetarit me vullnetin e Zotit, pra demokracija të zëvendësohet me sheriat dhe për të ndryshuar orientimin civilizues të shqipëtarve drejt kampit islamik!
Ajo që i karakterizon islamistët politik dhe nuk tingëllon aspak shpresdhënse është shkalla e ultë e tolerancës ndaj mendimit ndryshe! Sidomos për çfardo shjellje apo mendim i shprehur e që nuk përputhet me librin e shenjët. Kërcnimet, frikësimet, ofendimet dhe nofka e islamofob-it, janë të zakonshme ndaj atyre që mendojnë ndryshe.
E dijmë nga e kaluara se e vërteta për të cilën nuk lejohet debat, vret! Direkt apo indirekt!
Dikur komunistët kishin shpallur të vërtetën e tyre. Ishe me ‘ta ose kundër tyre! Në emër të vërtetës mund të bëhej çdo gjë! Në emër të vërtetës u vranë dhjetra milion njerëz.
Edhe fashizmi kishte shpallur të vërtetën e tijë, përjashtuese, e cila nuk lejonte debat dhe për pasojë dhjetëra milion njerëz kishin gjetur vdekjen. Askush nuk jepte llogari për këtë.
Apo të këthehemi më larg në histori, kur kisha e krishtere thoshte se dielli sillet rreth tokës. Kjo dhe të vërteta të tjera. Ata që shprehën dyshime, u shëndrruan në “lëndë djegëse”! Kush nuk ka dëgjuar për inkuizicionin, Brunon, Galileon?!
A nuk ju duket se fenomeni i quajtur “e vërteta ime” është vrasësi më masiv në historinë njerëzore?
Fakti se pas kaq luftërash në Ballkan ende nuk është arritur paqe e qëndrueshme na mëson se nuk jemi marë aspak me idetë të cilat frymëzojnë individët dhe grupet të bëjnë krime , të shfarosin popuj, në emër të “vërtetës së tyre”!
Edhe sot, çdo debat mer karakter ndërnacional, sikurse në lindje që mer karakter ndërfetar!
Duke ndjekur ide të mëdha, me qëllimin më të mirë, shpesh u bënë krime të mëdha!
Civilizimi perëndimor është këtu ku është sot, sepse e tejkaloi inkuizicionin dhe idetë autoritare e destruktive si fashizmi, komunizmi, rasizmi, nacionalizmi përjashtues të cilat dolën nga gjiri i vet!
Kjo formulë që jep shpresë edhe në këtë situatë konfuze, është ajo e demokracisë kundër autoritarizmit!
