Nga Federica Mogherini
Më 9 maj 1950, Robert Schuman u bëri thirrje kombeve të Evropës të bashkoheshin dhe ta bënin të pamundur luftën në kontinentin tonë. 65 vjet më vonë, mesazhi i tij i paqes dhe unitetit është po aq me vend sa gjithnjë.
Thirrja e Schuman-it për të kapërcyer ndarjet e vjetra vetëm pesë vjet pas Luftës së Dytë Botërore shtroi themelet për atë që u bë Bashkimi Europian. Ndër vite Bashkimi ynë është rritur nga gjashtë në njëzet e tetë vende, për t’u bërë projekti më i madh i paqes në botë. Ëndrrat e etërve tanë themelues janë bërë realitet.
Por paqja dhe prosperiteti – bazuar në një angazhim të thellë ndaj të drejtave themelore, demokracisë dhe shtetit ligjor – nuk mund të merren të mirëqena. Është një punë e vazhdueshme në progres, diçka që duhet ushqyer dhe mbrojtur.
Teksa spektri i luftës është kthyer në kontinentin tonë, bashkimi ynë vazhdon të jetë forca jonë më e madhe. Kur ligjet ndërkombëtare shkelen dhe dinjiteti njerëzor trajtohet me përbuzje, ne kemi përgjegjësinë të ngrihemi për të mbrojtur vlerat tona themelore dhe interesat që ndajmë me njerëzit në mbarë botën.
Kjo është e para Dita e Europës që e festojmë me një drejtim të ri në krye të Bashkimit tonë. Që ditën e parë në detyrë i jemi kushtuar punës si ekip dhe përhapjes së mesazhit të bashkimit në Europë dhe në botë.
Bashkimi Europian është një projekt i përditshëm paqeje. Çdo anëtar, i madh apo i vogël, i vjetër apo i ri ka një vend në tryezë dhe një zë të njëjtë. Ndërtimi i bashkimit nga diversiteti mund të jetë i vështirë, por bashkëpunimi i vazhdueshëm dhe negociatat e durueshme na çojnë drejt një konsensusi të fuqishëm. Kjo është ajo që duhet të arrijmë sot botërisht. Ne krijuam Shërbimin Europian për Veprimin e Jashtëm për të punuar me partnerët në botë – në Afrikë dhe në botën arabe, në Amerikë dhe Azi – drejt këtij synimi.
Mbarimi i luftës ka të bëjë me kapërcimin e ndarjeve dhe bashkimin e armiqve të dikurshëm. Ka të bëjë gjithashtu me dhënien brezave të rinj një pikete për të ardhmen e tyre. Ja pse jemi bashkuar në luftën kundër ekstremizmit dhe krimit të organizuar; duke u përballur me ndikimin negativ të ndryshimeve klimaterike dhe sigurimin e energjisë sonë në të ardhmen.
Ne punojmë për rritjen e standardeve botërore që kushdo të mund të pijë ujë të pastër dhe të thithë ajër të pastër; të shijojë standardin e lartë të jetesës dhe produktet cilësore që kemi në Europë. Ne punojmë gjithashtu me partnerë në mbarë globin për të investuar në arsim dhe në risi, për t’u hapur një botë mundësish edhe atyre që kanë lindur në varfëri dhe konflikt.
Bashkimi Europian është një projekt për të ardhmen. Ndaj ne sot festojmë Ditën e Europës për të kujtuar, por edhe për të vështruar përpara. Shpresoj se do të bashkoheni me ne në mbarë globin, për të punuar me ne për një botë ku njerëzit, pavarësisht kush janë apo ku jetojnë, janë të lirë t’i japin formë ekzistencës së tyre dhe të përpiqen për ëndrrat e tyre.
*Përfaqësuese e Lartë e BE për Punët e Jashtme dhe Politikat e Sigurisë
