Ka kaluar afro një javë që kur në emisionin Opinion të Blendi Fevziut, gazetari Artan Hoxha tregoi disa përgjime mes Ilir Metës dhe Kastriot Ismailajt, ku krei i LSI-së i kërkonte mikut të tij 200 mijë euro disa ditë përpara zgjedhjeve të vitit 2009. Dhe që prej këtij denoncimi nuk kanë pushuar spekullimet. A ishte kjo pjesë e një skenari të parapërgatitur? A dinte gjë drejtuesi i emisionit? A ishte një lojë më e madhe.
Fillimisht gazetari Artan Hoxha që zbardhi dokumentat e përgjimit të prokurorisë foli në emisionin “Zululand” të Mustafa Nanos. Ai tha se I’a kishte punuar Fevziut dhe se nuk i kish thënë gjë se dispononte ato dokumenta nga frika se mos ndalohej publikimi i tyre. Një variant krej të kundërt mbrojti drejtuesi i emisionit rival me Fevziun, Sokol Balla. Në një shkrim për gazetën Java ai hidhte dyshime se e gjitha qe një skenar në kuadrin e një loje me të madhe të TV Klanit, për të goditur Metën. Balla ironizonte me faktin se denoncimi për kreun e kuvendit doli gjoja rastësisht. Lidhur me këtë debat është përgjigjur më së fundi edhe vetë drejtuesi i emisionit Opinion në faqen e këtij emisioni : “Një javë më parë, në një emision të organizuar për përgjimet që bëjnë mediat me qëllim goditjen e korrupsionit (Emision që mori shkak nga shikushmëria e madhe e emisionit Stop në javën e tij të parë) qëlloi të ishte i ftuar edhe gazetari Artan Hoxha. Panelet gjithnjë vendosen në një mbledhje me së paku 10 vetë dhe jo pa u debatuar më parë. Një prej gazetarëve propozoi Artan Hoxhën për arsye të filmimeve që ai kishte komentuar shpesh në media, ku hyjnë edhe pamjet e 21 Janarit, ta rrëmbimit të Stafukës apo edhe ato të vrasjes së Komisar Dritan Lamajt. Hoxha pranoi dhe gjatë emisionit, ku u duk disi pasiv, publikoi një sms shkëmbyer mes Ismailajt dhe një politikani të lartë që ai vetë e identifikoi me Ilir Metën, në atë kohë, Kryetar i LSI dhe deputet. Sqaroi madje edhe detajet ligjore apo antiligjore në të cilat ishte kryer ajo nga Prokuroria. Në fakt, personalisht nuk kisha dijeni për atë sms. Ky ishte edhe difekti i emisionit”.
Duke u mbrojtur ndaj dyshimeve që janë hedhur e duke iu përgjigjur indirect edhe kolegut të tij Sokol Balla, Fevziu thotë madje se po ta kishte ditur do ti kishte kushtuar më shumë rëndësi këtij fakti:
“Nëse Hoxha do ma kishte thënë që në fillim, nuk do t’ja jepja fjalën në fund dhe as do ta kaloja pa përqëndrimin e nevojshëm. Do ja jepja fjalën që në fillim dhe do ta kisha përqëndruar emisionin tek ajo sms dhe ajo dosje. Asgjë më shumë se sa ai denoncim nuk mund të tërhiqte vëmendjen e publikut që atë moment arriti diku në 58 % ose baraz me një televizor në 2 ndezur tek ai emision. Një drejtues emisioni nuk mund të ëndërrojë asgjë më të madhe se sa kaq. Si gazetar, të kesh mundësinë e një denoncimi të tillë, po ashtu është një kulm profesional. Vërtetësia apo jo e faktit i takon padyshim gazetarit që e bëri denoncimin. Ajo që i mbetet emisionit është thjeshtë oponenca dhe gjithë pikëpyetjet që publiku ngre në këtë rast. Për ta bërë siç duhet detyrën që ka”.
