Para se të vdiste, Jovanka, gruaja e Josip Broz Titos, kishte arritur t’i shkruante memoaret e saj dhe t’i dërgonte ato dikund jashtë Serbisë, me qëllim që të botohen pas vdekjes së saj.
Botimi i këtyre memoareve po pritet me interes të jashtëzakonshëm në Serbi, por edhe me ankth.
”Memoaret do ta zbërthejnë në detaje kohën në të cilën jetuam, kush ishin projektuesit nën hije të fatit tonë” ka thënë për gazetën beogradase “Veçernje Novosti” regjisori Milan Saraç, mik shumëvjeçar i Jovanka Brozit.
Jovanka i kishte thënë Saraçit se shënimet e saj kanë të bëjnë me kohën kur ajo ishte me Titon.
Sipas tij, në këto kujtime janë përfshirë pesë të panjohura për publikun në Serbi e ish-Jugosllavi: çka ka qenë e panjohur për Titon, cila ka qenë arsyeja e rrëzimit të Aleksandar Rankoviqit, ku gjenden eshtrat e liderit të çetnikëve Drazha Mihajloviqit, kush çka ka punuar gjatë kohës së okupimit fashist dhe rrëfime nga jeta e kundërshtarëve politikë të kohës së saj.
Saraç ka thë se memoaret janë ruajtur një kohë të gjatë jashtë Serbisë, te një mik i Jovankës, dhe, sipas tij, këto memoare kërkohen nga Shërbimi Sekret Serb dhe disa shërbime të tjera.
“Nuk e di kush është miku i saj, por jam i sigurt se dorëshkrimi nuk është në Serbi. Pas këtyre shënimeve janë në kërkim shërbimet sekrete të Serbisë dhe disa të tjera, të cilat kanë qenë të involvuara në ngjarjet që i ka përshkruar Jovanka Broz. Supozohet se ajo kishte informacione për shumë qërime hesapesh që janë bërë prapa kulisave”, ka thënë Saraç.
Jovanka Broz ishte dëshmitare e proceseve të shumta politike, të brendshme dhe ndërkombëtare. Disa prej këtyre proceseve janë aktuale edhe sot, për shkak të pasojave që kanë prodhuar ato.
“Jovanka ishte e kërcënuar me vdekje dhe i ishte ndaluar të shkruante, gjatë kohës që ajo ishte në izolim. Megjithatë, para fundit të jetës, ajo kishte vendosur të shkruante gjithëçka që kishte ditur”, ka thënë miku i saj Saraç për “Novosti”, transmeton “Fatkinews”.
