I gjendur për të dytën herë në më pak se 1 javë përballë qindra tregtarëve, që i protestojën poshtë zyrës, Erion Veliaj është përpjekur të shpjegojë se vendimin për të rritur taksën për hapësirat publike, për bizneset që e shfrytëzojnë atë, e ka marrë për të ndihmuar qytetarët. Ja çfarë thotë kryebashkiaku i Tiranës për të legjitimuar vendimin e tij që ka shkaktuar revoltë tek biznesi i vogël.
“Vetëm për biznesin e madh që vendo dhjetëra tavolina merren 50 lekë për tavolinë që ka zënë trotuarin, ku kalon një grua me karrocë. 50 lekë për një tavolinë që u ka bllokuar një vend ku një i moshuar do të ecë. Hapësira publike është pronë e qytetit…”.
Pra, sipas Veliajt, rritja e taksës bëhet për shkak se këta biznese kanë zënë hapësirat publike. Por kjo mënyrë që Kryetari i Bashkisë së Tiranës ka zgjedhur për të mbrojtur veten përballë valës së protestave që i kanë shpërthyer nga të katër anët, e nxjerr atë bllof.
Nëse tavolinat e lokaleve kanë zënë hapësirat publike ku duhet të kalojë një grua me karrocë apo një i moshuar, bashkia thjesht nuk duhet të lejojë vendosjen e tavolinave apo tezgave dhe jo më t’i taksojë.
Taksimi, në masën që ishte apo në atë të renë, të rritur me 15 herë, vetëm sa e ligjëron zaptimin e hapësirës publike dhe u jep të drejtë pronarëve të lokaleve kundrejt ankesave që mund të kenë qytetarët.
Kur një biznes e zë këtë hapësirë, që Veliajt i pëlqen ta thotë se “është pronë e qytetit”, bashkia ka detyrimin ligjor t’ia kthejë atë qytetit dhe qytetarit.
Rritja e taksës nuk e liron hapësirën publike, por ligjëron “grabitjen” e saj. Duke paguar taksat për zënien e trotuareve, çdo biznes do të jetë i mbrojtur, pasi këtë akt tashmë e ka të ligjëruar nga bashkia.
Për të liruar hapësirat publike, në ish –Bllok apo gjetkë nëpër Tiranë, Veliaj duhet të vazhdojë aksionin e nisur kur u ul në karrigen e kryebashkiakut, duke hequr të gjitha tavolinat e tezgat që pengojnë lëvizjen e njerëzve apo edhe të makinave dhe jo t’i legjitimojë ato.
Në këtë mënyrë, argumenti që jep kryebashkiaku Erion Veliaj, jo vetëm që e nxjerr atë bllof në justifikimin që ka gjetur për rritjen e taksave, por edhe në gënjeshtër në raport me premtimet elektorale për t’ua kthyer hapësirat publike qytetarëve.
