Zëvendëskryeministri Fatmir Besimi thotë se “Maqedonia duhet të sigurojë që marrëdhëniet ndëretnike janë më të avancuara dhe duhet të vazhdojë puna në këtë drejtim, me qëllim që të rritet besueshmëria mes maqedonasve dhe shqiptarëve”
Zëvendëskryeministri shqiptar në qeverinë maqedonas të Nikolla Gruevskit, Fatmir Besimi thotë se zbatimi i plotë i Marrëveshjes së Ohrit është domosdoshmëri dhe veçanërisht porosi e Brukselit si pjesë e udhës drejt integrimit.
Ish-ministër i Mbrojtjes, Besimi tha se në krye të axhendës do të jenë Marrëveshja e Ohrit dhe pavarësia e gjyqësorit.
Zoti Besimi u citua nga televizioni “Alsat-M” në Shkup, kryeqyteti i shtetit maqedonas (Shkupi iu hoq Shqipërisë nga Konferenca e Londrës në 1913) të ketë treguar hapat që gjyqësori “të ketë një besueshmëri më të madhe në institucionet e vendit”:
“Së pari për qytetarët e vendit është të sigurojmë që kemi gjyqësor, i cili është i pavarur, profesional dhe jo selektiv”.
“Një demokraci dhe barazi për të gjithë qytetarët, – vijoi zoti Besimi, – këtu nënkuptojmë marrëdhëniet si bazë për marrëdhëniet e mira ndëretnike, ashtu edhe pozicioni i BE-së që M.O vazhdon të jetë një dokument esencial në demokracinë e vendit dhe sundimit e ligjit”.
Sipas tij “Maqedonia duhet të sigurojë që marrëdhëniet ndëretnike janë më të avancuara dhe duhet të vazhdojë puna në këtë drejtim, me qëllim që të rritet besueshmëria mes maqedonasve dhe shqiptarëve”.
Zëvendëskryeministri pranoi, siç raportoi agjencia “Zhurnal”, se “me një dosje të tillë Maqedonia vë në pikëpyetje edhe rekomandimin për hapjen e negociatave”.
“Përveç reformave, Brukseli ndjek nga afër edhe zbatimin e dialogut politik si një nga kriteret dhe vlerat bazë të Unionit. Deri në shtator vendi mund të arrijë rezultate konkrete në të gjithë temat”-tha ai.
Megjithatë zoti Besimi pranoi se “këto ndikojnë në vlerësimin e Brukselit në progresin e vendit në drejtim të BE-së”:
“Normalisht që ajo e cila do të varet rekomandimi është sa i përket reformave që i kemi në agjendë, është me rëndësi që edhe opozita të ofrohet në tavolinë të bisedojë për temat që e tangojnë vendin sa i përket procesit të integrimeve evropiane”.
Pas takimit të Këshillit për Stabilizim dhe Asociim, sipas “Zhurnalit”, autoritetet e Brukselit tërhoqën vërejtjen për krizën politike në vend dhe mungesën e dialogut politik:
“Ato i bënë thirrje lidershipit në vend që të përmirësojë marrëdhëniet ndëretnike duke zbatuar plotësisht Marrëveshjen e Ohrit dhe të punojnë në përmirësimin e cilësisë së institucioneve, në veçanti të gjyqësorit dhe lirisë së mediave”.
