Ish-kryeministri Sali Berisha ka akuzuar rëndë kryeministrin Edi Rama dhe ata që ai i quan neo-bllokmenë se vollën vrer për 8 dhjetorin, duke u përpjekur ti jepnin atributet etërve të tyre.
Në faqen e tij zyrtare të Facebook, Berisha tha se 8 dhjetori është dita e ngadhënjimit dhe transformimit më paqësor në historinë e vendit.
“Të dashur miq, neo-bllokmenët urrejnë për vdekje 8 dhjetorin sepse kjo dite e bekuar, dita e lëvizjes, ngadhënjimit, transformimit më paqësor në historinë e vendit, arkivoi në kalendat e turpit të historisë, 8 dhjetorin ditën simbol të pushtetit mizor të etërve të tyre kriminelë dhe të shtypjes më të egër në histori të shqiptarëve por dhe e parajsës tokësore të fëmijërisë dhe rinisë së tyre”, shkruan Berisha.
Ai ka ironizuar deklaratën e ministrit Erion Veliaj, që i atribuoi Ramës organizimin e lëvizjes studentore, ndërkohë që vetë Rama e ka pranuar më herët se më 8 dhjetor ndodhej në Greqi.
“Neo-bllokmenët 8 dhjetorin e kanë ditë ferri, sepse kjo ditë hapi dyert e lirisë për shqiptarët të mbyllura për 45 vjet nga etërit e tyre vrasës. Për Edi Ramen dhe neo-bllokmenët e tjerë kjo ditë e mallkuar që bëri të lirë shqiptarët më mire të mos ishte kurrë! Ndaj, pasi u bë gazi i dheut me paraqitjen që i bëri Veliaj për t’u njohur si organizator i 8 dhjetorit 1990, pra në përpjekjen haluçinante për të përvetësuar këtë ditë të shenjtë në kalendarin e lirisë së shqiptarëve, Rama më pas bëri çdo gjë që 8 dhjetorin 1990 t’ua atribuonte etërve të tij që përmbysi lëvizja studentore e 8 dhjetorit”, është shprehur ish-kryeministri.
Berisha u shpreh se “Rama angazhoi bastardë dhe lakej për të shpifur” se kush ishte në krye të lëvizjes së 8 dhjetorit.
“Për këtë qëllim, ai me tërbim të papërmbajtur angazhoi bastardë dhe lakej për të shpifur dhe trilluar ndaj 8 dhjetorit dhe lëvizjes studentore. Ata, me urrejtje të madhe, më të nxirë se boja me të cilën shkarravisin vrerin e tyre, trilluan se ishin jo studentët por vetë etërit e tyre me në krye Nexhmijen dhe mëkëmbësin e saj që organizuan përmbysjen e pushtetit te bllokmenëve”, ka thënë Berisha.
Ish-kryeministri ka shkruar se “Sipas neo-bllokmenëve, bastardëve dhe lakenjve të tyre mjeran ishin baballarët, pra bllokmenet hoxhist dhe jo studentët, heronjtë e demokracisë dhe pluralizmit shqiptar”.
“Këtë pretendim nuk e patën kurrë etërit e tyre për 8 dhjetorin për së gjalli. Ramiz Alia, vite më vonë do të deklaronte se ai vet nuk ishte për pluralizmin. Por ai u imponua nga uragani i lëvizjes së studentëve, punëtorëve dhe qytetarëve të Tiranës dhe frika e fatit të Çausheskut. Këto qëndrime të kujtojnë një fjalë të vjetër latine që thotë se “Të vegjlit e bagëtive të egra bëhen më të egra se vet ato”, përfundon reagimi i Berishës.
