Ish-kryeministri, Sali Berisha deklaron se në Shqipëri ka kudo kriminalitet, pasi krimi është vet qeveria dhe kreu i saj Edi Rama.
Përmes një postimi në rrjetin social Facebook, Berisha bën të ditur se krimi në vend dëshmohet nga zhvillimet dramatike në procesin gjyqësor të ekzekutimit tek dera e shtëpisë e komisarit Dritan Lame.
Berisha nënvizon se Rama është vet koka e krimit sepse më datë 15 shtator mediat dhe policia njoftojnë se dëshmitarit të mbrojtur nga policia i kanë vendosur tritol nën sediljen e makinës.
Shkrimi i plotë i Sali Berishës
Në Shqipëri krimi është vet qeveria dhe kreu i saj Edvin Kristaq Rama! Të dashur miq, kriminalitet ka kudo por në Shqipëri, krimi është vet qeveria dhe kreu i saj është Edvin Kristaq Rama. Zhvillimet dramatike në procesin gjyqësor të ekzekutimit tek dera e shtëpisë e komisarit Dritan Lame dëshmojnë në mënyrë të pakundërshtueshme se Rama vet është kreu i krimit në Shqipëri. Le t’u referohemi fakteve:
– Në revanshin për të uzurpuar institucionet e pavarura, Rama bëri disa ligje anti-kushtetuese, për të cilat i duhej shumicë e cilësuar. Në një nga ato seanca, grupi Frroku (Toma dhe shokët) ikën nga Parlamenti duke bërë që të humbej shumica e cilësuar. Të dy bashkëkryetarët e “aleancës së qelbësirave”, Rama – Meta, i shkuan në restorant duke iu lutur grupit të tyre të votonin ligjet në Parlament. Pjesë e negociatës Rama – Frroku për votimin e ligjeve ishte lëshimi i vëllait të Frrokut nga burgu përmes “ikjes së dëshmitarit në drejtim të paditur”. Të dyja palët e mbajtën fjalën. Ligjet u votuan të nesërmen dhe po atë ditë komisar Dritan Lamaj u tradhtua nga shteti i tij për interesa të ulëta të klikes Rama – Meta. Dëshmitari i vetëm okular në vendin e ngjarjes që mbrohej nga policia nuk u paraqit në seancën gjyqësore. Sipas policisë, që e kishte në mbrojtje, ai u arratis në drejtim të panjohur.
– Rama është vet koka e krimit sepse më dt 15 shtator mediat dhe policia njoftojnë se dëshmitarit të mbrojtur nga policia i kanë vendosur tritol nën sediljen e makinës. Burime nga policia më njoftuan se vendi i vendosjes dhe sasia e tritolit ishin të njëjta me vendvendosjen dhe tritolin në të ndenjurat e Besnik Dervishit. Të nesërmen, policia, ndonëse e kishte njoftuar një ditë më parë,vendosjen e tritolit mori urdhër ta mohonte këtë ngjarje dhe mediave iu bënë kërcënime dhe presion nga qeveria që lajmin të mos e transmetonin.
– Me urdhër nga lart, në shkelje të të gjitha ligjeve,policia dekonspiroi emrin e vërtetë të dëshmitarit dhe bëri publike foton e tij, gjë që nuk ka ndodhur kurrë më parë.
– Rama është koka e krimit sepse para pak ditësh, dëshmitarit të cilin policia e kishte strehuar në një banesë të fshehtë, sipas mediave i shkuan për vizitë i ati i Frrokut me dy të tjerë me një mesazh të prerë: “Mbylle gojën ose kokën”.
Ky është vetëm njeri nga rastet e shumta që dëshmon se në Shqipëri krimi është kryeministër, kryetar parlamenti e qeverie dhe vendi protektorat krimi. I bëj thirrje prokurorisë së shtetit të nisë urgjent hetimin për të gjitha këto akte që zëvendësojnë ligjin dhe shtetin ligjor me krimin dhe sundimin e tij dhe t’i garantojë me çdo kusht mbrojtje dëshmitarit të vetëm në procesin e ekzekutimit të komisarit Lame. Është shumë e qartë që, në zbatim të marrëveshjes së 29 korrikut, Rama dhe falangat e tij duan ta eliminojnë atë fizikisht. Ftoj qytetarët të ngrihen kundër aleancës së kriminelëve sepse revolta popullore e të gjithë qytetarëve që nuk duan të qeverisen nga krimi është jetike për fatin e tyre dhe te vendit!!
