Zëvendes Kryeministri Niko Peleshi dhe ambasadori italian Massimo Gaiani nënshkruan në Këshillin e Ministrave të Shqipërisë protokollin e ri dypalësh të Bashkëpunimit për Zhvillim 2014-2016. Në fjalën e tij zoti Peleshi tha se ky protokoll dëshmon edhe njëherë angaxhimin e Qeverisë Italiane për të mbështetur Shqipërinë në procesin e zhvillimit dhe integrimit në Bashkimin Evropian. Ai bëri me dije se kooperacioni Italian për Zhvillim është aktiv në Shqipëri që prej vitit 1991, më një mbështetje që kalon vlerën e 700 milionë euro dhe në periudhën 2000-2014, Italia ka përfaqësuar donatorin dypalësh më të rëndësishëm në vend. “Duke falenderuar Qeverinë Italiane për këtë mbështetje, shpreh angazhimin tonë maksimal për të zbatuar me sukses programet të cilat përbëjnë priotetete të rëndësishme të qeverisë Shqiptare”, u shpreh Peleshi. Për zbatimin e këtij protokolli, Qeveria italiane vë në dispozicion një shumë të përgjithshme prej 81.7 milionë Euro, nga të cilat 56.7 milionë Euro kredi e butë, 20 milionë Euro konvertim borxhi dhe 5 milionë Euro grant. Prioritetet strategjike që do të mbështeten në peiudhën e ardhshme tre vjeçare janë: Rritja e Qëndrueshme nëpërmjet nxitjes së konkurrueshmërisë dhe përdorimit eficient të burimeve. Nën këtë shtyllë finacohen programet e: -Zhvillimit Ekonomik, me fokus nxitjen e Investimeve të Huaja, me 22.4 milionë euro. -Bujqësia dhe Zhvillimi Rural, e financuar me 5 milionë euro; -Sektorit Energjetik mbështetet me 16.2 milionë euro; -Sektori i Ujësjellës-Kanalizimeve me 10.5 milionë euro; -Nën shtyllën e dytë: Investimi tek Njerëzit dhe Kohezioni Social do të financohen:- Faza e dytë e Programit të Konvertimit të Borxhit për sektorët socialë me një fond prej 20 milionë euro; dhe sektori i Arsimit dhe Formimit Profesional, me 5 milionë euro. -Shtylla e tretë: Qeverisja e mirë, Demokratizimi shteti Ligjor mbështet Reformën Territoriale-Administrative me 0.8 milionë euro; Nënshkrimi i Protokollit të Ri është në vazhdimësi si dhe kurorëzon marrëveshjen politike të firmosur më 25 korrik 2014 nga Ministrja e atëhershme e Punëve të Jashtme italiane Federica Mogherini, sot Perfaqësuese e Lartë e Bashkimit Evropian për Punët e Jashtme dhe Politikat e Sigurise dhe Ministrit shqiptar të Punëve të Jashtme Ditmir Bushati.
