Një kontribut të tillë, në shtimin e punëtorëve shtetas të huaj, që nga viti 2010 e ka shtuar koncerciumi “Bechtel & Enka”, e cila ka bërë ndërtimin e Rrugës së Kombit.
Shtetasit e huaj të cilët po kërkojnë punë në Kosovë vijnë, nga shtete të ndryshme, por më së shumti janë nga Rumania, Maqedonia, Turqia, Kroacia, Shqipëria. Por ka edhe nga vende tjera si nga Amerika, Franca, Gjermania, Çekia, nga Ukraina si dhe nga vende tjera.
“Ne si AVONET, gjatë disa monitorimeve, të cilat i kemi bërë kemi kuptuar që tashmë kjo kompani së fundmi, është duke bërë largimin e shqiptarëve, nga puna duke e zëvendësuar me punësimin e shtetasve rumun. Kjo gjë është mjaft shqetësuese për ne pasi që një gjendje e tillë do të kontribuoj në shtimin e varfërisë, dhe ballafaqimin e qytetarëve tonë me problemin e sigurimit të ekzistencës”, thuhet në komunikatën e Rrjetit të OJQ-ve AVONET nga Ferizaj.
Në këtë situatë, sipas kësaj organizate përveç kompanisë, Bechtel & Enka e cila po bënë punësimin e këtyre shtetasve në mënyrë ilegale, përgjegjësia bie mbi institucionet e Republikës së Kosovës e cila duhet të bëjë pajisjen me leje pune të shtetasve të huaj të cilët duan të punojnë në Kosovë.
“Andaj ne bëjmë thirrje që punësimet e tilla ilegale të parandalohen dhe të mos largohen nga puna shtetasit tonë pasi që kjo situatë çdo herë e më shumë do të ndikoj, në shtimin e papunësisë dhe varfërisë njëkohësisht”, thuhet në komunikatën e Rrjetit të OJQ-ve AVONET nga Ferizaj.
