Prokuroria: A.Aliaj abuzoi me overdraftet, kartat e kreditit, transfertat e parave dhe kreditë
Një punonjëse banke e nivelit të dytë ka arritur të vjedhë rreth 200 mijë euro, ndërsa pas zbulimit të skemës është arrestuar nga policia me urdhër të Prokurorisë së Tiranës. Gjatë hetimeve paraprake ka rezultuar se A. Aliaj, me detyrë specialiste krediti në filialin e një banke në Kamzë, nëpërmjet veprimeve të kundërligjshme, ka arritur të mashtrojë një numër të madh klientësh, duke u marrë atyre shuma të konsiderueshme parash nga llogaritë bankare ose duke u hapur, pa dijeninë e shtetasve llogari kredie, të cilat më pas i tërhiqte vetë. Hetimi ka nisur pas denoncimit të klientëve të bankës. Mësohet se akuza ka faktuar katër skema të kësaj vjedhjeje.
Overdraftet
Sipas akuzës, punonjësja e bankës ka miratuar overdraftet për disa klientë të bankës, të cilët nuk e kanë kërkuar këtë shërbim. Pasi është miratuar overdrafti nga llogaria e këtyre klientëve (pa dijeninë e tyre) fondet kanë kaluar në llogarinë e një shtetasi, të njohur të personit nën hetim, e cila rezulton të ketë tërhequr këto fonde. Për gjashtë klientë janë miratuar overdrafte pa dijeni e tyre. Gjatë pyetjeve, ata kanë pohuar se nuk kanë kërkuar një shërbim të tillë dhe nuk kanë pasur dijeni për transfertat e parave nga llogaria e tyre në llogarinë e një shtetasi tjetër. Ndërkohë, personi që ka përfituar këto shuma, ka pohuar se paratë i ka tërhequr Aliaj në emër të saj dhe ajo ka firmosur mandatet e tërheqjes në mirëbesim.
Kartat e kreditit
Pas pezullimit të përkohshëm nga detyra të A. Aliaj, në fillim të muajit mars 2013, auditi i bankës ka gjetur 2 karta krediti me PIN-et përkatëse në tavolinën e kësaj shtetaseje. Gjithashtu, është gjetur dhe PIN-i i një karte tjetër krediti, që i përkiste shtetases Z.M. Për këtë arsye, auditi ka kontrolluar transaksionet e kartave të kreditit për këto tre klientë dhe ka konstatuar se të gjitha transaksionet e këtyre kartave të kreditit ishin të lidhura me tre shitës POS-sesh. Prej këtij kontrolli janë identifikuar tregtarët me transaksionet respektive të dyshimta që vinin nga përdorimi i POS-ve. Të dëmtuarit kanë pohuar se nuk kanë kërkuar dhe nuk ka tërhequr pranë bankës kartë krediti. Ajo ka deklaruar se nuk ishte në dijeni për kartën e kreditit dhe për më tepër, ajo nuk dinte se çfarë ishte një kartë krediti.
Transferimi
Me datë 14 shtator 2012 shtetasi A.M. ka hapur një depozitë bankare pranë bankës në shumën 3 000 000 lekë. Pas dy-tri ditësh nga depozitimi i kësaj shume, klienti është telefonuar nga specialistja e kredisë, A. Aliaj, me të cilën ka pasur njohje të mëparshme. Ajo i ka kërkuar ndihmë A.M. që ta ndihmonte me depozitën e tij, me qëllim që kjo depozite të vendosej si garanci për një kredi bankare, duke i premtuar se depozita nuk do prekej, si nga ana e saj, ashtu edhe banka. Ai ka pranuar dhe ka nënshkruar te noteri disa dokumente, por pa u kushtuar rëndësi. Në muajin janar të 2013, A.M. ka pasur probleme shëndetësore të një familjari dhe për këtë shkak ka dashur të tërheqë paratë nga depozita e tij e kursimit. Ai është takuar me A. Aliaj dhe ka kërkuar prishjen depozitës dhe tërheqjen e 5000 euro. Kjo e fundit e ka këshilluar të mos e prishë depozitën dhe i ka dhënë në ambientet e bankës shumën 5000 euro. Në muajin mars të 2013 shtetasi A.M është telefonuar nga banka, ku i është komunikuar se kishte pa paguar dy këste kredie. Pas bisedës, ka marrë në telefon specialisten e bankës A. Aliaj, të cilës i ka treguar bisedën. Shtetasi A.M, në ketë kohë ka mësuar të vërtetën se A. Aliaj kishte çelur një kredi në emrin e tij, të cilën e kishte përfituar për vete në shumën 2.700 000 lekë. Për të konstatuar faktin nëse përfituesi i kredisë ka qenë prezent ditën dhe orën e tërheqjes së këtyre shumave, janë sekuestruar pamjet filmike të këtyre datave. Ka rezultuar se shtetasi A.M nuk ka qenë prezent në momentin e tërheqjes dhe paratë janë tërhequr nga arkëtari nga A. Aliaj.
Kredia
Prokuroria ka faktuar edhe disa raste të marrjes së kredisë nga ana e klientëve në bankën ku punonte A. Aliaj, të cilat kanë pasur probleme gjatë ndërhyrjes së vetë të së pandehurës. Një shtetase, e cila kishte qenë e rregullt me një kredi të marrë, ka evidentuar vonesa të kredisë që nga muaji maj 2009. Në lidhje me këto vonesa, deklaruesja R.T pretendon se ajo ka qenë e punësuar së bashku me bashkëshortin e saj, te shtetasja A. Aliaj për punime në ndërtimin e shtëpisë së saj dhe të kunatit. Ajo deklaron se i ishte premtuar nga shtetasja A. Aliaj, që kjo e fundit do të vazhdonte pagesat e kredisë në këmbim të punës që ata do kryenin. Puna e pretenduar që është kryer nga çifti T. ka qenë në vlerën e 150.000 lekë, ndërkohë pretendohet se janë paguar me para në dorë vetëm për nevoja të vogla në vlerën 15.000 lekë. Megjithatë, sipas dosjes, sërish e arrestuara ka ndërhyrë, duke përvetësuar qindra mijëra lekë. Sokol Çobo/shqip
