Policia e ka evakuuar Kryeministrin e Serbisë, Aleksandër Vuçiq dhe familjen e tij në “një lokacion të sigurt” të shtunën mbrëma.
Ministri i Brendshëm. Nebojsha Stefanoviq, ka thënë se evakuimi i kryeministrit është bërë pasi afër shtëpisë së tij është gjetur një sasi e konsiderueshme e armëve.
Armët, përfshirë një raketahedhës, granata dore dhe municion të ndryshëm, janë gjetur në shkurre, në lokacionin fqinj Jajinci, afër një udhëkryqi ku zakonisht e ul shpejtësinë eskorta e Vuçiqit derisa futet në shtëpi, u ka thënë gazetarëve Stefanoviq, raporton Reuters.
“Kryeministri tani është i sigurt, sikurse edhe familja e tij… Është brengosëse se armët ishin në atë vend ku eskorta e tij zakonisht ul shpejtësinë në pothuajse 10km/h”, ka thënë ai.
Stefanoviq nuk ka pranuar të tregojë se ku ka qenë kryeministri në kohën kur janë gjetur armët.
“Kjo është konfidenciale… Megjithatë, ai është në një lokacion të sigurt tani”, është shprehur Stefanoviq.
“Çelësi i sigurisë së kryeministrit do të jetë puna e inteligjencës sonë për të zbuluar se kush ka qëllime të tilla dhe të bëjmë gjithçka është e mundur për të parandaluar këtë”, ka shtuar ministri serb i Punëve të Brendshme.
Asnjë arrestim nuk është bërë deri më tani në lidhje me këtë incident, i cili vjen vetëm pesë ditë pas arrestimit të një grupi njerëzish lidhur me një komplot të dyshuar në Mal të Zi dhe pas disa vrasjeve të stilit mafioz nëpër rruget e Beogradit.
