Ai u kap nga autoritetet amerikane më 19 shtator, pasi u plagos gjatë përleshjes me policinë në Nju Xherzi. Momentalisht ai gjendet në spital për trajtim mjekësor.
Rahami po përballet edhe me akuza për përleshje të armatosur me policinë, ku dy policë mbetën të plagosur.
Hetuesit thonë se Rahami ka vendosur dy bomba në lagjen Chelsea. Njëra prej tyre ka shpërthyer duke plagosur 31 persona, ndërsa bomba tjetër u gjet nga policia.
Ai kishte vendosur po ashtu edhe një bombë në qytetin e Nju Xhersit.
Rahami po akuzohet po ashtu për lënien e disa eksplozivëve në një kosh të mbeturinave pranë një stacioni të trenit në një qytet tjetër në Nju Xhersi.
Ndërkaq, FBI thotë se ka shikuar të kaluarën e Rahamit dhe ka gjetur se para dy vjetësh babai i tij kishte deklaruar tek autoritetet se ai ishte i shqetësuar se djali i tij mund të jetë terrorist.
Autoritetet e rendit thanë se babai i Rahamit më vonë i kishte thënë agjentëve të FBI-së se ai kishte menduar se djali i tij po shoqërohet me njerëz të këqinj.
Por zyrtarët kanë thënë se FBI-ja ka hetuar dhe nuk ka gjetur asnjë lidhje në mes të Rahamit dhe organizatave ndërkombëtare terroriste.
Hetuesit kanë thënë se kur është kapur ai, i kanë gjetur një fletore me shënime që kishin përmbajtje ekstremiste.
Sipas tyre në fletore shkruhet se “Ju (qeveria e SHBA-së) po vazhdoni masakrën kundër muxhahedinëve, luftëtarëve të shenjtë, në Afganistan dhe vende të tjera”.
“Vdekje kundër shtypjes suaj”, thuhet tutje në shkrimin e Rahamit.
Në këtë dorëshkrim po ashtu ka lavdata kundër Osama bin Laden dhe Anwar al-Awlaki, një mysliman klerik i vrarë nga sulmet me dron më 2011. Ai gjithashtu kishte përmedur Nidal Hasan, një ish-oficer të ushtrisë amerikane që kreu një sulm vdekjeprurës në vitin 2009 në Fort Hood, Texas.
