Tribunali i Hagës sot ka vendosur të lirojë përkohësisht të akuzuarin për krime të luftës në ish-Jugosllavi, Vojisllav Seshel, por ai nuk do të ishte vetvetja sikur të mos kërcënonte menjëherë dikënd që menmdon se i ka fajet për qëndrimin e tij 12-vjeçar në Hagë.
Ky ish-nënkryetar i qeverisë së ish-RFJ-së së Sllobodan Millosheviqit, dhe kryetar i Partisë Radikale Serbe, sapo ka kuptuar se do të lirohet përkohësisht ka kërcënuar me hakmarrje.
“Nëse edhe vij në Serbi, nuk do të merrem me shërimin tim, por të gjitha fuqitë do t’i orientoj në hakmarrje”, u ka deklaruar ai diplomatëve serbë të mërkurën në Tribunalin e Hagës.
Në këtë mënyrë, si merr vesh gazeta beogradase Blic, ka reaguar dje Shesheli sapo ka dëgjuar informacionin se do të mund të dilte në liri të përkohshme.
Krahas këtij kërcënimi, që nuk dihet se kujt i është drejtuar (por mund të supozohet me saktësi të madhe se ka menduar në presidentin dhe kryeministrin aktual serb, përkatësisht Tomisllav NIkoliq dhe Aleksandar Vuçiq, të cilët kanë qenë në udhëheqjen e ngushtë të partisë së tij, por më vonë e kanë braktisur dhe kanë formuar parti të re), Shesheli ka thënë se nuk do të pranojë kurrfarë garancish as kushtëzimesh. E vetmja që e ka interesuar atë, thonë burimet diplomatike, ishte që Tribunali ta lirojë dhe ta lëshojë në shtëpi.
Partia Radikale Serbe ka përjetuar fiasko të plotë gjatë këtyre 12 vjetëve dhe sot ka një numër të vogël përkrahësish.
Në Sheveningen është konstatuar se ai vuan nga kanceri në mëlçi, madje në fazë metastaze.
