“Nëse Europa nuk sheh drejt Ballkanit, e ardhmja e tij mund të jetë fatale”-tha kryeministri Edi Rama
Presidenti i Republikës, Bujar Nishani, ka njoftuar se do të organizojë ditën e hënë një pritje me rastin e marrjes së statusit të vendit kandidat për në BE.
Ceremonia festive do të organizohet në Pallatin e Brigadave, në orën 19:30, ku janë të ftuar deputetë të Kuvendit të Shqipërisë, ministra të kabinetit qeveritar, përfaqësues të medias, të institucioneve të pavarura dhe Trupit Diplomatik.
Pritet që gjatë kësaj pritjeje të ketë një fjalë të kreut të shtetit, i cili do të japë vlerësimet mbi palët për kontributorët e marrjes së statusit që është refuzuar tri herë më parë nga Bashkimi Europian.
Festa qeveritare
Kurse, maxhoranca festoi dje marrjen e statusit të vendit kandidat përmes një ceremonie që mbante më shumë era Europë, sesa traditë. Për rreth një orë, artistët e Liceut Artistik interpretuan pjesë nga klasikët europianë, ndërsa kori i vajzave në fund këndoi himnin e Europës së Ludvig Van Bethovenit.
Çdo gjë në kopshtin mbretëror të Pallatit të Brigadave ishte dekoduar me ngjyrat e flamurit të BE-së, blu me fjongo të verdhë për karriget, ndërsa projektorët ndriçonin me ngjyrat e “Rilindjes”. Ceremonia, që pritej të niste në orën 20:00, filloi 20 minuta me vonesë edhe për shkak të kampionatit botëror të futbollit.
Të parët që mbërritën ishin prefektët, më pas deputetët e me radhë ambasadorët. Të ftuar ishin të gjithë deputetët e Kuvendit, Presidenti i Republikës, ish-kryeministrat dhe ish-kryetarët e Kuvendit.
Mungoi dje në ceremoni ish-kryeministri Fatos Nano, ish-presidentët Alfred Moisiu dhe Bamir Topi.
Dje në ceremoninë e maxhorancës u rikthye avokat Ngjela. Pak para nisjes së ceremonisë mbërriti dhe ish-presidenti Meidani, zv.kryeministri i Kosovës, Behgjet Pacolli, ministrja e Integrimit Çitaku dhe kryetarja e Bashkisë së Gjakovës, Mimoza Kusari Lila.
Kryeministri Edi Rama me bashkëshorten Linda mbërritën rreth orës 20:15 dhe pak minuta më pas kryetari i Kuvendit, Ilir Meta.
Rama nuk e kishte vënë re që para tij kishte mbërritur ish-presidenti Rexhep Meidani.
U çua nga vendi dhe e takoi duke i uruar mirëseardhjen. Takimin më të ngrohtë Rama e pati me avokat Ngjelën në koktejin e organizuar pas ceremonisë. Gjatë koktejit ishte vetë Rama që bëri të zotin e shtëpisë, duke i pritur të gjithë në kopshtin e shatërvanit e duke i uruar me një gotë shampanjë.
Mesazhet
Në fjalën e mbajtur dje gjatë ceremonisë, Kryeministri Rama i kërkoi Bashkimit Europian që t’i japë Ballkanit atë rëndësi që u ka dhënë dhe vendeve të tjera europiane, që të zhvillohen dhe të dalin nga gjendja aktuale.
“E nëse BE nuk do të shohë sot drejt Ballkanit si drejt një pjesë të Europës e cila ka nevojë për BE po aq sa BE ka nevojë për të, e nesërmja mund të na rezervojë një rikthim fatal të së shkuarës pa paqe dhe me pasoja që nuk mund as t’i imagjinojmë dot sot”, tha Rama.
Duke iu përgjigjur skeptikëve europianë, Rama tha se “Shqipëria nuk është një vend mysliman, por europian”.
“Por vetë Shqipëria nuk ka ditur dot t’i tregojë asaj ane të kontinenti që ky i yni nuk është një vend mysliman, por një vend europian ku jetojnë në paqe myslimanë dhe të krishterë, të cilët e shohin prej kohësh Europën si destinacionin e tyre dhe e besojnë ende fuqimisht atë si identitetin e tyre”, tha Rama.
Sipas tij, statusi i vendit kandidat u mor vetëm pas kthesës së madhe që gjërat morën në vend pas rotacionit të pushtetit.
“Pa zgjedhjet e lira të 23 qershorit, pa drejtimin e ri e si asnjëherë me sensin kushtetues të të qëndruarit mbi palët nga kryetari ynë i Kuvendit, pa 9 muajt e punës intensive të qeverisjes sonë të re, rezultate të duartrokitura botërisht si mbresëlënëse dhe dinamikës krejt të re të politikës sonë të jashtme, Shqipëria nuk do ta kishte marrë dot kurrë këtë javë statusin e refuzuar disa herë rresht.
Por s’ka dyshim se rruga, përpjekjet dhe rezultati për të mbërritur në këtë destinacion kaq të rëndësishëm për vendin dhe popullin tonë nuk përmblidhen kurrsesi në këta nëntë muaj”, tha Rama në mbyllje të fjalës së tij.
Ministra e deputetë, jashtë shtetit
Në ceremoninë e djeshme mungonin disa deputetë dhe ministra, të cilët ndodheshin jashtë shtetit. Ra në sy mungesa e ministrit të Brendshëm Tahiri dhe atij të Mirëqenies Sociale dhe Rinisë, Veliaj. Por dhe kryetari i Grupit socialist, Gramoz Ruçi, Pandeli Majko, Arta Dade munguan dje. Burime nga PS thanë se ata ndodhen në delegacione parlamentare dhe partiake jashtë shtetit.
Zaganjori dhe Llalla në ceremoni
Kryetari i Gjykatës së Lartë dhe Pokurori i Përgjithshëm morën gjithashtu pjesë dje në ceremoninë e organizuar nga qeveria shqiptare.
Ata ishin të përpiktë në orar dhe më pas gjatë koktejit të organizuar pas ceremonisë zyrtare, ata ishin nën shoqërinë e deputetëve të maxhorancës të Komisionit Parlamentar të Ligjeve dhe ministrit për marrëdhëniet me Parlamentin, Ilirjan Celibashi. Aristir Lumezi
