“Shumë shpejt do të vijë ora e Çamërisë, shume shpejt do t’i kthehemi vatrës sonë”. Kështu u shpreh djekryetari i Partisë Drejtësisë Integrim dhe Unitet, në tubimin e organizuar në kujtim të 70-vjetorit të genocidit grek ndaj popullisë çame.
“Të gjithë bashkë, shumë shpejt, ne do t’i kthehemi vatrës sonë e do t’i gëzojmë pasuritë e prindërve tanë, se ato janë tonat. Sot është koha të zgjidhim çështjen çame dhe shumë shpejt do të vijë ora e Çamërisë”, u shpreh Idrizi.
Shoqata Çamëria organizoi aktivitetin në kuadër të 70 vjetorit të genocidit ndaj shqiptarëve të Çamërisë, me moton “Ne nuk harrojmë”.
Në aktivitetin përkujtimor, në praninë e mijëra pjesëmarrësve, kreu i PDIU-së tha se 70 vjet më parë popullsia çame u gjend pa përkrahje.
“Kur 70 vjet më parë grekët, larguan pjesën më vitale, pjesën më luftarake të popullsisë së vet, paraardhësit e të cilëve kishin themeluar Greqinë moderne, ne çamët ishim vetëm. Nuk na u gjendën pranë as anglezët. As amerikanët që gjendeshin në territorin grek. Me ndonjë përjashtim të vogël. Nuk na u gjend pranë as atdheu, as shteti ynë i dobët. Kur 70 vjet më parë, pasardhësit e Xhavellës, Bocarëve, Andrucove, Shkurtanjëve, u përzunë, u vranë në mënyrë të përgjakshme, çamët ishin vetëm me veten e tyre. Shqipëria, atdheu ynë kishte zgjedhur komunizmin si nënë dhe si babë. Fati ynë u sakrifikua për hir të aleancave ideologjike”, tha Idrizi.
Sipas tij, PDIU është partia që do ta çojë drejt zgjidhjes çështjen çame. “Sot në kohën e lirisë, ne PDIU, që e kuptuam se pa një parti të çështjes kombëtare, çështja çame do të mbetej vetëm çështja jonë, çështje e një komuniteti, dhe jo e një kombi të tërë. Ne të PDIU-së jemi dhe parti kombëtare dhe parti europiane.
Ne të PDIU-së jemi dhe parti e bashkimit kombëtar dhe parti e integrimit europian. Ne e dimë mirë se pa bashkim kombëtar shqiptarët do të jenë më të dobët përballë fqinjëve dhe botës.
Ne të PDIU-së, jemi sot partia e vetme që mban të gjallë flamurin e shqiptarizmit në parlament. Kjo është arsyeja pse ne jemi aleatët më të fortë të Lëvizjes Vetëvendosja në Kosovë që e vetme mban të palëkundur flamurin kombëtar”, tha Idrizi.
Kryetari i Vetëvendosjes, Albin Kurti tha se çështja çame ka nevojë për mbështetjen e të gjithë shqiptarëve. “Shqiptarët janë komb i fuqishëm por me shtete të dobëta. Fqinjët tanë janë kombe më të dobëta se shqiptarët, por i kanë shtetet më të fuqishme se shqiptarët. Shqiptarët duhet ta bëjë shtetin e fuqishëm. Çështja çame është pjesë e tërësisë dhe ka nevojë për vëmendjen e të gjithë neve, pavarësisht prej nga vijmë në trojet tona në Ballkan” tha Albin Kurti.
