Qindra persona kanë udhëtuar jashtë vendit me para të Ministrisë së Punëve të Jashtme (MPJ) pa qenë fare punëtorë të këtij dikasteri. MPJ ka paguar plot 115 bileta për udhëtime jashtë vendit për personat që nuk kanë qenë pjesë të kësaj ministrie.
Raporti i Auditorit ka gjetur se për këto udhëtime nuk kishte ftesa dhe aprovime paraprake nga MPJ.
“Prej shtatë pagesave të testuara në vlerë 217,248 euro, MPJ ka paguar 115 bileta në vlerë prej 118,621 euro për persona të cilët nuk ishin të punësuar apo zyrtarë të ministrisë”, thuhet në raport.
Lidhur me këtë çështje auditori vlerëson si rrezik se MPJ nuk kishte kontroll të duhur në procesimin e pagesave.
“Pagesat e kryera shoqërohen me rrezikun që të mos jenë në pajtim me kërkesat ligjore dhe t’i kenë shkaktuar shpenzime të paplanifikuara financiare ministrisë”.
Auditori rekomandon ministrinë se duhet t’i forcojë proceset dhe kontrollet në lidhje me shpenzimet e udhëtimit. Kontrollet duhet të shtohen në procedurat e aprovimeve si dhe ndalimi i pagesave jashtë planifikimit buxhetor, shkruan Tribuna.
