Ambasada Franceze ka reaguar ashpër pas deklaratës së kryeministrit Rama mbi çështjen e vaksinës COVID-19.
Në një letër dërguar Ministrisë sonë të Jashtme, ambasada i kërkon kreut të qeverisë të mos sulmojë vendet e Bashkimit Europian, teksa shton se Franca ka qenë donatori kryesor për Shqipërinë.
Ambasada ndalet tek deklarata e kryeministrit në Open, i cili tha se BE u tregua egoiste dhe cinike, në shpërndarjen e vaksinave.
Lidhur me këtë deklaratë, ambasada mohon që Franca të ketë stok vaksinash, dhe thotë se nuk është e përshtatshme për një kryeministër të sulmojë hapur një vend mik dhe aleat si Franca.
Letra e plotë:
Mbrëmë në një transmetim televiziv, Sh.T.Z, Edi Rama kryeministër i Shqipërisë, akuzoi qartë vendet anëtare të Bashkimit Evropian, për egoizëm dhe cinizëm. Kjo ambasadë kujton se çdo vit, Bashkimi Evropian është donatori më i madh në Shqipëri me më shumë se 100 milionë euro, në sektorë të ndryshëm. Lidhur me pandeminë, Komisioni Evropian njoftoi më 8 janar se portofoli global i BE-së prej 2.3 miliardë dozash nuk ishte vetëm për BE por edhe për vendet fqinje. Financimi u sigurua për vendet e Ballkanit Perëndimor me 70 milionë euro nga programi IPA.
Ndërsa Franca do të arrijë qëllimin e saj për 1 milionë njerëz të vaksinuar në fund të janarit, kryeministri ngriti pyetjen pse Franca duhet të ketë një stok vaksinash që nuk mund ti përdorë, në vend që ti ndajë me të tjerët. Përveç natyrës së pavërtetë të këtij informacioni, por që mund të jetë shumë i ndjeshëm për mendjet e njerëzve, kjo ambasadë konsideron se nuk është e përshtatshme të sulmosh në këtë mënyrë nominative, një vend mik dhe aleat.
Kujtojmë që në emisionin ‘Open’, Rama u shpreh saktësisht: “BE-së ia kemi çuar prej kohës sasinë e nevojshme që na duhet të vaksinave. KE është një strukturë e cila punon ditë natë, dhe kam shumë respekt. BE është më shumë se KE. Nuk është vendim i BE që të mos shpërndajë vaksina. Ne kemi çuar te BE ato që na ka kërkuar. Në mbledhje ata thanë që çdo vend mund të bëjë negociata me vendet bilaterale. Nuk ka KE-ja sot vaksina që të në mungojnë ne plani kombëtar dhe ndaj s’po na i jep.
Ne nuk i kemi kërkuar lekë, por vaksina. Covax është platformë që shpresojmë të sjelli doza, dhe aty nuk kemi nevojë për paratë e BE-së sepse kemi paguar. S’kemi nevojë për paratë e BE sepse kemi parapaguar. Mbase më ka keqkuptuar por nuk i heq asnjë presje. Lidhen me disa vende që egoizmin e kanë kthyer në sistem. Nuk i kushtonte asgjë. Franca ka bërë pak mijëra, ndërkohë që ka shumë më tepër. Ç’kuptim ka të kesh stok dhe të mos i thuash këtyre vendeve që; merrni dhe ju. Ça i kushtonte? Asgjë. Kjo ka qenë kritika ime,”-tha Rama.
