Reforma që Edi Rama premtoi gjatë fushatës për “shkuljen e parazitëve nga administrata”, kalon përmes PD apo LSI. Votat e njërës apo tjetrës parti në opozitë, i duhen Ramës për kalimin e një reforme të dytë territoriale që kërkon 84 vota. Me shumë gjasa votat për kalimin e kësaj reforme, Edi Rama shpreson t’i gjejë nga një konsensus me Partinë Demokratike. Pas 8 vjetësh që ishte në pushtet, njerëzit e LSI janë shpërndarë kudo në administratë dhe nga shkrirja e këtyre institucioneve ata do të jenë të parët që do ta pësojnë.
Por para se të mendojë për votat e partive të opozitës, PS ka nisur punën për për projektin e shkrirjes së drejtorive dhe agjensive “të tepërta” në shtet.
Ndarja e re e territorit, për herë të parë u përmend në Asamblenë e PS-së nga Niko Peleshi. Shqipëria ndahet në 4 krahina sipas kësaj reforme, tha ai. Në bazë të këtyre krahinave ndodh edhe shkrirja e drejtorive dhe krijimi i drejtorive dhe agjensive të reja.
Nga ato që ka parashikuar Niko Peleshi, janë shkrirë gjithsej 37 agjensi varësie dhe shumë drejtori.
“Jemi duke marrë një reformë territoriale, kemi organizuar territorin e Shqipërisë sipas pikëpamjes zhvillimore në 4 rajone të mëdha. Propozojmë 4 agjensi rajonale të sistemit shëndetësor, pra nga 1 agjensi për çdo rajon. 4 drejtori të sigurisë së cilësisë së arsimit, që do të zëvendësojnë 13 agjensitë arsimore rajonale. 4 agjensi rajonale të mjedisit. Shërbimi social shtetëror nga 12 të organizohet në 4. Dhe në një perspektivë jo afatshkurtër, edhe degët rajonale të thesarit pas përfundimit të procesit të digjitalizimit të mund të dekoncentrohen në 4 nga 36 që janë sot” u shpreh Peleshi sot në Asamble./ Lapsi.al
DREJTORITE QE SHKRIHEN TEK DISA PREJ MINISTRIVE
Tek Ministria e Bujqësisë
Shkrihen drejtoritë e Bujqësisë
Tek Ministria e Financave
Drejtoria e Tatimeve shkrihet me atë të Doganave në Agjensinë Kombëtare të të Ardhurave
Tek Ministria e Shëndetësisë
Shkrihen 11 drejtori dhe autoritete rajonale shëndetësore në 4 agjensi të përkujdesit rajonal
Tek Ministria e Brendshme
Drejtoritë e Rezervave Materiale dhe Emergjencat Civile shkrihen në Agjensisë e Mbrojtjes Civile
Tek Ministria e Mirëqënies Sociale
Shkrihen 12 Drejtori të Shërbimit Social Shëndetësor në 4 drejtori për 4 rajone
Tek Ministria e Arsimit
Shkrihet Instituti i Zhvillimit të Arsimit dhe Inspektoriati i Arsimit për të krijuar Agjensinë e Sigurimit të Cilësisë të Arsimit Parauniversitar
Shkrihen 13 drejtori të Arsimit në 4 drejtori të arsimit parauniversitar
Tek Ministria e Ekonomisë
Shkrihet Drejtoria e Akreditimit me Drejtorinë e Standardizimit. Krijohen Agjensia e Akreditimit dhe Standardizimit
Tek Ministria e Zhvillimit Urban
Shkrihet Enti i Banesave, krijohet Fondi i Strehimit
ALUIZNI integrohet në Ndërmarrjen e Hipotekimit
Tek Ministria e Mjedisit
Agjensia Kombëtare e Mjedisit bashkohet me Agjensinë për Zonat e Mbrojtura
