Nga Artan Fuga
Tirana po qelbet, me tubacione uji copë – copë, me ujë me pompa, me fasada, trotuare dhe rrugë si në Siri paslufte, me fije telefoni si lesh arapi, me stacione autobuzi si kasolle saharianësh, pa pemë, pa hapësira të gjelbërta, plehra si vatra infeksioni, me depo uji në rrugë nga arabistani; përmbytet pas çdo vese shiu, me gropa ku në makinë nxjerr gurë nga veshkat… e ne dëgjojmë për 1 milionë dollarë investim për park andej nga liqeni i Kasharit ku tironcit do shkojnë me biçikleta të gjuajnë peshk dhe dalin në “selfhije” ditën e diel, të bëjnë shëtitje me varka, pasi të nderin lëveret në ballkon përballë dritares së komshiut.
Sidomos të papunët e Tiranës atje do shkojnë të frekuentojnë kafenetë dhe restorantet shik me të dashurat e tyre. Do të bëjnë sport dhe relaks pas nje jave të lodhshme nga papunësia në Tiranë.
Ore, a ka keshill bashkiak ne Tirane apo e kane ngrëne këtë shaka në Kashar…
Ngaqë nuk e di se ku bëhet dëgjesa publike në buze të pellgut me kolltuqe kinemaje, spektakël i shëmtuar, estradë, po e them këtu – se ky investim është i gabuar dhe i bën lekët tona rrush e kumbulla e fruta e tjera.
Çfarë abuzimi… Dhe në TV. nxjerrin dy kasharas të lodhur që thone të shkretët: Sa mirë që zona do të gjallërohet…!
A thua se nuk ka urbanistë, sociologë, ekonomistë të dëgjohen…
