Me breshëri kallashnikovi qëlloi kushëririn e tij, vetëm sepse i kishin hyrë 2 viça në oborr dhe po i hanin jonxhën. Sipas policisë, viktima, një 29-vjeçar nga fshati Gërnac i Rrethit të Kurbinit, ndonëse ishte dënuar në vitin 2008, për “kultivim droge”, kishte filluar punë si mësues. Policia shpalli në kërkim autorin, një 50-vjeçar, nga i njëjti fshat, teksa tentonte të arratisej në male. Nga burimet zyrtare të Policisë së Kurbinit mësohet se ngjarja ka ndodhur rreth orës 16.30, të ditës së djeshme. Sipas të njëjtave burime mësohet se shkak i konfliktit midis viktimës, Jetmir Hasa (Hasneziri), 29 vjeç dhe autorit të krimit, i cili është i afërmi i tij, Deli Alkurti, 50 vjeç, ka qenë hyrja në kopshtin e autorit të krimit të dy viçave në pronësi të viktimës. Sipas hetimeve të kryera nga ana e policisë, dy viçat e Hasës kanë thyer gardhin e Alkurtit, duke hyrë në kopshtin e tij, i cili ishte mbjellë me jonxhë. Ndërsa Alkurti ka dalë nga banesa duke parë dy viçat, që po i hanin jonxhën, ai i ka mbajtur në vend, duke kërkuar edhe pronarin. Siç bën të ditur policia, me t’u përballur me Hasën, kanë nisur edhe debatet, midis 50-vjeçarit dhe viktimës, ku mësohet se autori i krimit është ofenduar nga ana e viktimës. Kaq ka mjaftuar që Deli Alkurti të futej në banesën e tij, për të marrë kallashnikovin dhe më pas të dilte për të qëlluar mbi 29-vjeçarin Jetmir Hasa (Hasneziri). Sipas policisë, viktima ka marrë tre plumba në kokë dhe trup duke gjetur vdekjen, ndërsa autori i vrasjes ka mundur të largohej nga banesa, për t’u fshehur në malet e Kurbinit. Njoftimi i menjëhershëm i policisë ka bërë që forca të shumta të mbërrijnë në fshatin Gërnac, për të rrethuar zonën, ndërsa deri dje në mbrëmje policia nuk dha detaje nëse është arrestuar apo jo. Ndërkaq, janë marrë në pyetje banorë të zonës, ndonëse me numër të pakët, pasi në lagjen e konfliktit jetojnë vetëm tri familje. Pjesa tjetër janë larguar në drejtim të qyteteve të ndryshme. Nga dëshmitë që janë marrë nga banorët, mësohet se është konfirmuar edhe shkaku i konfliktit, pra hyrja e dy viçave në oborrin e të dyshuarit për vrasje. Sipas burimeve zyrtare të policisë së Kurbinit, viktima Jetmir Hasa (Hasneziri) ishte mësues në një shkollë 9-vjeçare. Më parë ai ka pasur precedentë penalë, për shkak se në vitin 2008 ishte arrestuar, për kultivim të bimëve narkotike, kanabis sativa dhe ishte dënuar me 4 vjet burg. Pas dënimit, ai ishte rikthyer sërish në punë, si mësues. Policia lokale thotë se ka marrë në ruajtje anëtarët e familjes së autorit të krimit, me qëllim për të shmangur një hakmarrje të mundshme nga ana e viktimës. Ndërsa ditën e sotme do të zhvillohet ceremonia mortore e 29-vjeçarit.
