Partia Demokratike ka akuzuar qeverinë Rama për abuzime financiare, në lidhje me dekorin e Tiranës për vizitën e Papa Françeskut. Sipas koordinatores për mediat, Grida Duma, faktet tregojnë se kompania fituese është e Veliajt dhe ndonëse ka pasur vetëm 3 punonjës e nuk plotësonte asnjë kusht teknik, i janë dhënë me prokurim të drejtpërdrejtë 394 milionë lekë.
Gjithashtu ajo thotë se njerëzit e ngushtë të Ramës po bëhen gati tu vërsulen fondeve të majme, për festat qeveritare të 70 vjetorit të çlirimit. “Njerëzit e Veliajt dhe grupi i ngushtë i Ramës, morën 394 milionë lekë, me prokurim të drejtpërdrejtë, pa asnjë garë, me një kompani 9 muajshe, që nuk plotësonte asnjë kusht teknik dhe për të cilën ende nuk ka dhënë askush llogari.
Por fakte të reja që dalin në dritë e thellojnë skandalin edhe pse Edi Rama hesht, edhe pse sulmon opozitën sa herë gjendet para provave të pakontestueshme. Kompania e Veliajt, EAG, që nga dita e krijimit dhe deri sot, e pasuruar me 394 milionë lekë me një dorë, ka pasur vetëm 2 ose 3 punonjës.
E megjithatë kompania e Veliajt e lindur në janar me vetëm 2 apo 3 punonjës që nuk dorëzon dot as bilancin e vitit të shkuar, që as nuk e ka në objektin e saj dekorimin e qytetit, u kualifikua më e afta dhe shpallet fituese në një tender kaq të madh. Është e qartë se kemi të bëjmë me një histori pasurimi të shpejtë. Ministri i Mirëqenies dhe bashkëpunëtorët e tij afër Kryeministrit, e kanë ngritur këtë kompani për të fituar tenderët e qeverisë, për të marrë para, e për t’u pasuruar nga taksat e shqiptarëve që po zhyten çdo ditë e më shumë në varfëri, në borxhe, në papunësi e mjerim”-e mbyll akuzën Duma.
Kryeministria reagon: Nuk pati kohë për tender, shpifja e radhës
Kryeministria iu u është përgjigjur akuzave në lidhje me dekorimin e Tiranës, me rastin e vizitës së Atit të Shenjtë në Shqipëri. Dekorimi i kryeqyteti është bërë konform rregullave dhe në transparencë të plotë. Ligji parashikon rastet kur institucioni publik gjendet në kushte të nevojës ekstreme dhe e ka të pamundur të ndjekë procedurën normale të prokurimit.
Në rastin në fjalë, duke qenë se programi i vizitës së Atit të Shenjtë dhe të gjithë elementet e dekorit e të protokollit iu komunikuan zyrtarisht Qeverisë shqiptare, në datën 11 Gusht 2014, Autoriteti Kontraktor ishte në kushtet e nevojës ekstreme, për shkak të mospasjes së kohës së mjaftueshme për të zhvilluar procedurën normale të prokurimit.
“ Propozimi për të ndjekur këtë procedurë është bërë nga Komisioni Shtetëror për vizitën e Atit të Shenjtë, Komision ku u përfaqësuan të gjitha institucionet më të larta shtetërore, përfshirë dhe institucionin e Presidentit të Republikës, partitë parlamentare dhe Bashkinë e Tiranës, të cilët kanë shprehur dakordësinë e plotë me këto procedura në çdo mbledhje dhe për çka është dokumentuar çdo element.
Është për të ardhur keq që Partia Demokratike vazhdon të hedhë baltë mbi pritjen madhështore që populli shqiptar i rezervoi Papa Françeskut. Asnjë fakt, asnjë seriozitet, madje, asnjë përpjekje për ta kamufluar shpifjen e vrazhdë të radhës, po vetëm përsëritja e një recitimi banal para kamerave”- shprehet në një deklaratë zyrtare Kryeministria.
