M. Paul, New Delhi, 2 Shtator 2014
Para disa ditësh gazetari C. M. Paul intervistoi Dr Gëzim Alpion në lidhje me vizitën e Papës në Shqipëri dhe lobimin që ai po bën për të përshpejtuar procesin e shenjtërimit të Nënë Terezës. Intervista është botuar në disa gazeta në Indi si ‘Matters India’ në New Delhi dhe ‘The Guardian’ në shtetin Meghalaya. Dr Alpion, i cili sapo ka zhvilluar një intervistë tjetër për këto çështje me Radio Vatikanin, do të intervistohet për vizitën e Papës këto ditë edhe nga një numër gazetash, televizionesh dhe radiosh në Evropë, Amerikën e Veriut, Amerikën Latine dhe Australi.
Në më pak se 20 ditë, Papa Françesku do të bëj vizitën e tij historike në Shqipëri, vendi që Nënë Tereza e quante atdheun e saj. Megjithatë, heshtja e Vatikanit rreth bijës së famshme të këtij kombi krenar e ka irrituar bashkëkombasin e Nënë Terezës, Dr Gëzim Alpion, një akademik me reputacion ndërkombëtar.
Në mes të qershorit, Gëzim Alpion, i cili është lindur në Shqipëri dhe konsiderohet si ‘eksperti më autoritar në gjuhën angleze’ për Nënë Terezën, me iniciativën e tij filloi një fushatë online nëpërmjet të cilës i kërkohet Vatikanit të përshpejtoj shenjtërimin e Nënë Terezës.
Profesori i Sociologjisë në Universitetin e Birminghamit në Mbretërinë e Bashkuar, të cilit në vitin 1997 iu akordua një Doktoratë nga Universiteti i Durhamit, po në Angli, thekson: “Një nga arsyet se përse proçesi për shenjtërimin e Nënë Terezës është lënë pezull deri tani është si rezulat i bërjes publike të torturës shpirtërore që ajo përjetoi ndërsa vuante nga fenomeni që njihet si ‘nata e errët e shpirtit’. Për pasojë, në komunikimet konfidenciale me drejtuesit e saj shpirtëror në Indi, ajo shpesh pohoi se dyshonte në ekzistencën e Zotit si dhe në natyrën e frymëzimit të saj për tu shërbyer më të vobektëve.”
Dyshimet e Nënë Terezës u bënë publike fillimisht në dy shkrimet e kolegëve të saj, Albert Huart dhe Joseph Neuner, që u botuan respektivisht në vitin 2000 dhe 2001.
Intensiteti i agonisë shpirtërore që përjetoi Nënë Tereza doli në pah si asnjëhere tjetër me botimin e shkrimeve të saj private të titulluara ‘Bëhuni Drita Ime’. Ky libër kontroversal u editua nga prifti Brian Kolodiejchuk, i cili insiston se murgesha e mirënjohur “përjetoi një sfidë por jo një krizë besimi”, të cilën ajo gjoja e kaloi me sukses duke dëshmuar se dashuria “e ka burimin në vullnetin dhe jo në ndenjat e besimtarit”.
Ky libër, që u botua në vitin 2007, dhe ka për titull fjalët të cilat, sipas admiruesve të Nënë Terezës, Jezusi i pëshpëriti asaj në vitin 1946, është një përmbledhje letrash dhe dokumentash të ndryshme që murgesha shkroi rreth aspekteve të ndryshme të jetës së saj, disa nga të cilat dëshmojnë se ajo vuajti nga errësira shpirtërore për dekada me radhë. Libri në fjalë është rreth sfidës së besimit që Nënë Tereza përjetoi për 50 vjet, sfidë e cila ndryshon shumë nga ‘kriza’ e besimit.
Ky fenomen nuk është diçka e panjohur ndër shenjtorët. ‘Nata e errët e shpirtit’ njihet shumë mirë në teologjinë shpirtërore, dhe i atribohet Shenjtorit Gjoni i Kryqit, një poet spanjoll dhe mistik katolik në shekullin e 16-të. Gjoni i Kryqit është autori i poemës së mirënjohur ‘Nata e Errët e Shpirtit” (La noche oscura del alma), si dhe i një komenti të detajuar të poemës, të cilin ai e shkroi më vonë. Ndryshe nga prifti Kolodiejchuk, Profesori Alpion, i cili ka shtatë vjet që po studion ‘shkretëtirën shpirtërore’ të Nënë Terezës nga këndvështrimi i sociologjisë së fesë, insiston se, ndryshe nga shenjtorët mesjetarë dhe modern si Gjoni i Kryqit, Tereza e Avilës dhe Tereza e Lisieux-it, Nënë Tereza vuajti nga nata e errët e shpirtit deri në fund të jetës së saj.
“Përkushtimi ekzemplar i Nënë Terezës ndaj njerëzve ‘pa vlere’, pavarësisht se ju desh të duronte një torturë të tillë shpirtërore gjatë gjithë jetës së saj si misionare”, Alpion thekson, “është në vetvete një arritje mrekulluese unike”.
Alpion e mirëpret vizitën e Papës Françesku në Shqipëri por thekson se rëndësia e saj nuk ka të bëj vetëm me vendlindjen e tij. Siç shprehet Alpion: “Vizita e Papës në Tiranë me 21 shtator është një ngjarje e rëndësishme për Shqipërinë dhe Ballkanin.”
Alpion është dakord me konstatimin e Papës se Shqipëria paraqet një rast unik përsa i përket harmonisë ndërfetare. Megjithatë, sipas Alpion, disa këshilltarë të Vatikanit “me sa duket, kanë nevojë të ndjekin një kurs historie për të freskuar njohuritë e tyre.”
Alpion sqaron se “Papa nuk do të vizitojë një vend ‘Musliman’, siç është promovuar vizita e pontifit në disa raste; Shqipëria nuk ka fe zyrtare.”
Alpion gjithashtu shton se Shqipëria nuk është një nga vendet e ‘ish-Jugosllavisë, siç u shpreh Papa gjatë një interviste ndërsa po kthehej nga Koreja e Jugut.
Ata që përpiluan njoftimin e Papës më 16 qershor se ai do te vizitojë një vend “që ka vuajtur kaq gjatë si rezultat i pasojave të ideologjive të kaluara”, shton Alpion, duket sikur e kanë kopjuar fjalë për fjalë njoftimin për vizitën e Papës Gjon Pali i II-të në Shqipëri më 25 prill 1993.
Alpion u kujton funksionarëve të Vatikanit se “gabimet dhe krimet e komunizmit në Shqipëri nuk mund dhe nuk duhen harruar, por Kisha, me sa duket, duhet të mësoj nga Nënë Tereza që gjithmonë predikoi se duhet të mësojmë të falim.”
Gjithashu, Alpion thekson: “Djalli më i madh me të cilin Shqipëria po përballet në kohën tonë është korrupsioni, dhe personalitete si Papa duhet të ndjekin shembullin e Nënë Terezës e cila, ndërsa shoqërohej me njerëz të pasur dhe të fuqishëm, nuk qëndronte në heshtje kur vinte puna për të denoncuar ‘djajtë’ e kohës së saj. Si shumë të tjerë, edhe unë, nuk jam dakord me listën e ‘djajve’ që identifikoi Nënë Tereza; e rëndësishme është se udhëheqësit e botës e dinin se ajo githmonë do të shprehej hapur për ato që mendonte.”
Në një intervistë ekskluzive për ‘Matters India’, Alpion thekson: “Disa politikanë shqiptarë gjatë tre dekadave të fundit s’kanë lënë rast pa përdorur dhe sajuar për të rendur drejt Vatikanit për audienca dhe foto me Papën Gjon Pali i II-të, Bendiktin e XV-të dhe tani Françeskun. Sa kollaj do të ishte sikur krimi i korrupsioni dhe nepotizmi të fashiteshin si me magji thjesht duke takuar papën!”
Alpion do të kishte preferuar që “Vatikani t’i referohej në njoftimin për vizitën e Papës në Shqipëri traditës së lashtë kristiane të këtij vendi. Për te arritur në Romë, mesazhi i Krishtit kaloi nga Iliria, siç quhej vendi i paraardhësve të shqiptarëve. Kjo është e rëndësishme pasi Papa nuk po shkon në një ‘terra incognito’; vizita në Ballkan i jep Papës mundësinë të ecë në gjurmët e Shenjtorit Pal.”
Po aq e rëndësishme, sipas Alpion, është fakti që “të paktën 4 papa janë me origjinë shqiptare: Shenjtori Eleutherius (175-189), Shenjtori Caius (283-296), Xhoni i IV-të (640-642), and Klementi i XI-të (1700-1721)”.
Për këtë dhe për arsyje të tjera, nuk duhet të çuditemi që shqiptarët, një ndër kombet më të vjetër të Evropës, janë krenar për Nënë Terezën, e cila, pavarësisht se konsiderohej si shenjtore kur ishte gjallë, akoma nuk njihet formalisht nga Vatikani si e tillë.”
Alpion, i cili nuk ndjek asnjë besim fetar dhe e përshkruan veten si ‘racionalist shpirtëror’ thekson se vizita e Papës “është një rast i mirë për Vatikanin ta kuptoj se shqiptarët kanë qenë jo në skajet por në qendër të Kristianizmit që në fillimet e tij.”
Ai gjithashu shpreson se “Papa, më në fund, do të shpallë në Tiranë rifillimin e procesit të shenjtërimit të Nënë Terezës që është lënë pas dore pas vdekjes së mikut dhe kolegut të saj Papës Gjon Pali i II-të, i cili e dinte shumë mire kontributin e saj të paçmuar në shërbim të Kishës dhe papatit të tij.”
Peticioni në The Change.org, që Alpion filloi në mes të qershorit, ka më se 1,500 nënshkrues dhe është përkrahur nga peshkopë, aktorë të mirënjohur, priftërinj, murgesha, celebritete dhe njerëz që nuk ndjekin ndonjë besim fetar nga 45 vende.
Profesor Alpion shpreson se “vizita e Papës në Tiranë do të inkurajoj më shumë admirues të Nënë Terezës në Shqipëri dhe në mbarë botën që të nënshkruajnë peticionin nëpërmjet të cilit i kërkohet Vatikanit të përfundojë procesin e shenjtërimit të saj”.
Dr Alpion tërhoqi vëmendjen e mediave ndërkombëtare fillimisht në vitin 2004 ndërsa po shkruante librin e tij kontroversial ‘Nënë Tereza: Shenjtore apo e Famshme?’ (‘Mother Teresa: Saint or Celebrity?’), që u botua nga Routledge në Londër dhe New York në vitin 2007, Routledge India në New Delhi në vitin 2008, dhe Salerno Editrice në Romë po në vitin 2008.
Studimi i ri me të cilin Dr Alpion po merret që nga viti 2011, dhe që do të botohet në vitin 2015, pritet të hedhë dritë më shumë se ndonjë libër tjetër i botuar deri tani rreth viteve të para të jetës së Nënë Terezës, një periudhë që vazhdon të jetë akoma e pa eksploruar sa duhet në literaturën për murgeshën shqiptare.
Peticioni për shenjtërimin e Nënë Terezës mund të nënshkruhet duke klikuar linkun që vijon:
http://www.change.org/en-GB/petitions/the-vatican-canonize-mother-teresa-2
