Problemet me pronën vijojnë të jenë ende prezent në Shqipëri. Në zonën e Kombinatit një familje pretendon pronësinë në një tokë që policia thotë se është e shtetit.
Efektivë të rendit dhe të Policisë Bashkiake janë gjendur sot në mesditë në këtë pronë ku thuhet se do të ndërtohet një shkollë, pranë tregut të Kombinatit. 5 kushërinj, disa të rinj e të moshuar, janë përpjekur të mbrojnë pronën e tyre. Situata ka degraduar në përleshje me policinë e ofendime, ndërsa një i moshuar është tërhequr zvarrë nga efektivët pasi refuzonte shoqërimin për në komisariat.
Rasti është denoncuar nga një djalë, i cili thotë se janë shoqëruar në rajon 5 kushërinjtë e tij.
Raportuesi që ka denoncuar këtë rast shkruan se është përpjekur të komunikojë me policët, duke u kërkuar hipotekën, por ata i janë kthyer me fjalët: “Ik vrit veten, gjej sqarim ku të duash, nuk më intereson!”
Ai pretendon se kushëririt të tij i ka rënë tre herë të fikët nga dhuna që thotë se është ushtruar nga policët.
“Kjo është “policia qe duam” duke na marrë tokën e gjyshit me dhunë, duke na shoqëruar në komisariat. Shpresojmë t’më gjeni zgjidhje. Sot në orën 12 e 30 në njësinë nr.6 në Kombinat ku është tregu i Kombinatit janë shoqëruar në komisariat 5 kushërinjtë e mi pse mbrojnë pronën e vet, 3 të rinj, 2 të vjetër. Ai në video është kushëriri im, donin ta merrnin në komisariat, i ra 3 herë të fikët nga dhuna që ushtruan policët e komisariatit edhe të bashkisë, ishin mbi 20 të rendit mbi 30 bashkisë. Prona është në emër të gjyshit tim i cili nuk jeton më. U mundova të komunikoja me policët duke i thënë me nxirrni hipotekën që është në emër të shtetit edhe vazhdoni punën nëse ekziston kjo. Po më thanë: Ik vrit veten gjej sqarim ku të duash nuk më intereson. Aty duan të ndërtojnë një shkollë”, – thuhet në denoncimin e tij.
