Zëdhënësi i Lëvizjes Vetëvendosje, Shkodran Hoti ka thënë për lajmi.net se deklarata e kryeministrit Mustafa për rritje pagash nuk është asgjë më shumë sesa gjuhë elektorale.
“Duke pasur parasysh se jemi afër zgjedhjeve, kjo është asgjë më shumë sesa gjuhë elektorale, e cila nuk është gjë e re nga ta. Pra, bëhet fjalë për një kryeministër i cili në zgjedhjet e fundit ka premtuar hapjen e 120 mijë vendeve të reja të punës, gjë e cila përveç se nuk është realizuar, Isa Mustafa ka pranuar që ka gënjyer dhe një gënjeshtër të tillë e ka cilësuar si normale”, ka deklaruar Hoti.
Më tej, zëdhënësi i subjektit më të madh opozitar në vend ka rikutujtuar edhe disa nga premtimet që i kishte dhënë kryeministri Mustafa para zgjedhjeve të vitit 2014.
“Për fat të keq, kjo nuk ishte gënjeshtra e vetme e tij. Është i njëjti njeri i cili pati thënë se nuk bën koalicion me PDK-në, dhe më pas me partinë e tij u strukën nën sqetullën e Kadri Veselit, të cilin e akuzonin si kriminel, Ndërsa, në mandatin si kryeministër as nuk sollën zbutje të varfërisë, as nuk luftuan krimin e korrupsionin, as nuk sollën zhvillim ekonomik e as ndonjë projekt zhvillimor e në interes të vendit. Ai dhe koalicioni qeverisës u morën vetëm me marrëveshjet që rrezikojnë shtetësinë, e minimizojnë atë”, ka shtuar Hoti.
Por, Hoti ka thënë se “mashtrimi” me rritje pagash nuk do ta shpëtoj Mustafën nga rënia prej pushtetit.
“Pra, ajo që po bën Mustafa, është veprim pasi që e ka kuptuar rënien e tij dhe të partisë së tij, por ky mashtrim nuk do ta shpëtojë atë. Qytetarët do ta ndëshkojnë për gënjeshtrat e tij atë dhe partinë e tij, por edhe partnerin e tij në qeveri”, ka përfunduar Hoti.
Përndryshe, kryeministri i Kosovës, Isa Mustafa, në mbledhjen e sotme të Qeverisë kërkoi nga Ministria e Financave, që në koordinim edhe me Fondin Monetar Ndërkombëtar, të propozojë mundësinë e rritjes së pagave për shërbyesit civilë, për punëtorët e arsimit dhe ata të shëndetësisë. Por ky veprim si fillim i fushatës elektorale, pasi në këtë kohë flitet për shkuarje në zgjedhje të parakohshme parlamentare.
