“Drenasi është me perspektivë dhe nuk mund të mbetet pa investime të cilat e përmirësojnë jetën e qytetarëve. Unë këtu, gjej optimizëm se nesër do të jetë më mirë se sot. Këtë të sotme dhe të nesërme e bëjnë vetëm ata që vërtetë e duan e punojnë për vendin e tyre. Vlera e PDK-së janë njerëzit e saj që me vetëmohim ju prijnë proceseve. Kam besim se Ramiz Lladrovci është një nga këto vlera të Drenasit dhe ju ftoj ta vlerësoni këtë besim tonin”, tha Veseli.
Ndërsa kandidati i PDK-së për kryetar të Drenasit, Ramiz Lladrovci, këtë takim konsultativ e vlerësoi tejet të veçantë, sepse jo vetëm që u fol rreth projekteve aktuale por edhe projektet e së ardhmes.
“Takimi konsultativ me qytetarët tejkalonte pritjet tona, ngase, temë diskutimi doli të ishte jo vetëm e tashmja por edhe e ardhmja, sepse kryetari Veseli dha zotimin se Drenasi do të ketë përkrahje edhe më të madhe nga niveli qendror. Këtë ne e besojmë fuqishëm, sepse Partia Demokratike dhe Drenasi ishte, është dhe mbeten besnik të fitoreve të përbashkëta”, theksoi Ramiz Lladrovci dhe shtroi nevojën e ngritjes së mirëqenies si garancë e perspektivës së qytetarëve.
