Vendimi i Inspektoratit të Punës kishte konstatuar se punëtorë janë larguar nga puna në kundërshtim me ligjin dhe janë shkelur të drejtat e punës.
Hasani ka thënë për lajmi.net se kërkesa e tij për ekzekutim është e bazuar në ligjin e procedurës përmbarimore, që e detyron KEDS-in t’i kthejë në punë punëtorët që i ka larguar padrejtësisht.
“Shpresoj që të mos zvarritet vendimi për ekzekutim, sepse tashmë të gjitha faktet janë në anën e punëtorëve dhe nuk ka ndonjë arsye që mos kthehen në punë punëtorët. Institucionet e Kosovës duhet të jenë shumë të vëmendëshme kur bëhet fjalë për largimin e njerëzve nga puna padrejtësisht, në këtë rast edhe Gjykata Themelore”, ka thënë Hasani për lajmi.net.
Vendimi i Inspektoratit e ka alarmuar edhe menaxhmentin e KEDS-it, pasi ka kërkuar kthimin e punëtorëve të larguar në punë.
Drejtori i KEDS-it George Karagutoff, ka thirrur dje në takim kryetarin e Federatës Sindikale të Pavarur Elektrokosova, Hysni Gashin, duke i thënë se mund të përballen me padi, bashkë me përfaqësuesin e tyre ligjor, Nasuf Hasanin, sepse janë duke kërkuar kthimin e punëtorëve në punë.
Gashi ka thënë për lajmi.net se drejtori i KEDS-it ka kërkuar të di se a është Hasani përfaqësues ligjor i punëtorëve të larguar, dhe po ashtu është interesuar për ligjshmërinë e sindikatave.
“Më tha se mund të përballeni me padi, derisa unë i thash se Hasani është përfaqësues ligjor me dokumente që e kemi angazhuar për çështjen e largimit të punëtorëve”, ka thënë Gashi për lajmi.net.
Ndërsa avokati Hasani, e ka quajtur kërcënim, përmendjen e padisë nga drejtori i KEDS-it George Karagutoff.
Ai ka thënë se është e çuditshme ajo çka ka dëgjuar.
Hasani ka thënë se është i gatshëm të ballafaqohet me Karagutoff-in, me kushtin që ky i fundit të ketë prova të mjaftueshme, përndryshe do të jetë i paditur vetë shefi i KEDS-it.
Nasuf Hasani
“Nuk kemi çka me diskutu, le t’i drejtohet gjykatës, nëse ka prova të mjaftueshme, përndryshe mos të më çon fjalë duke më bërë kërcënime të ulëta”, ka thënë Hasani.
“Është çuditshme se si e kërcënon pas asnjë bazë, nëse ka prova le ta bazon padinë, ne jemi të gatshëm të ballafaqohemi me të, por sigurisht do të del humbës, si në të gjitha rastet deri tash”.
