Ngjarja e rëndë në Fier e regjiastruar vetëm pak ditë më parë, ku një 3-vjeçar ka mbetur i vdekur, duket se ende nuk është zbardhur nga autoritetet policore.
Bëhet me dije se ditën e sotme familjarët e 3-vjeçarit që ndërroi jetë në një kopsht privat nuk kanë gjetur paqe, teksa janë mbledhur para prokurorisë për të kërkuar drejtësi.
Sipas transmetimit të mediave në një rrëfim mes lotësh, nëna e djalit të mitur që ndërroi jetë, tregon se ishte edukatorja e kopshtit që e mori në telefon për ngjarjen. Sipas nënës së viktimës, edukatorja i kishte thënë se djali ishte përmendur ndërsa më pas doktorët e kishin njoftuar se i mitur ndërroi jetë.
“Edukatorja më ka gënjyer, më ka marrë mua të parën në telefon më tha është mbytur me litar të bluzës, është në gjendje të mirë dhe është përmendur. Në momentin që shkova në spital, më thanë është futur në sallë të operimit, pastaj doktori më tha fëmija ka ardhur pa jetë këtu. Na thanë ka kamera sigurie, por kur shkuam nuk kishte. Djali 15 kg nuk ka mundësi të mbytej nga varësja. Kërkoj drejtësi për shpirtin e Noas tim”, tha nëna mes lotësh.
Ndër të tjera mësohet se familjarët e vogëlushit që mbeti viktimë në kopsht kanë kërkuar takim me prokurorin për të hetuar të saktë ngjarjen sipas tyre, pavarësisht ngjarjes së rëndë kopshti vijon të jetë i hapur.
