Histori të hidhura, por realitete shqiptare…!
Emisioni investigativ “STOP” na sjell pranë dy familjeve të lëna në harresë dhe në mëshirë të fatit. Bëhet fjalë për dy familje të cilat ndodhen njëra në fshatin Kërçisht i Poshtëm, Dibër dhe tjetra në Postribë të Shkodrës.
Pamjet janë ato që flasin më tepër se fjalët…!
Këto familje jetojnë si në Mesjetë, të harruar nga shoqëria, të harruar nga shteti, pa të ardhura dhe pa të ardhme, ndërsa varfëria e “ulur këmbëkryq” është ajo që bën apel për ndihmë.
Migjeni mbase do të shkruante në një tjetër këndvështrim vargje për mjerimin, vargje të cilat përkojnë me realitetin e hidhur shqiptar të vitit 2016.
Familja e cila ndodhet në fshatin Kërçisht i poshtëm të komunës Maçellarë përbëhet nga 8 anëtarë të cilët jetojnë me vetëm 150 mijë lekë të vjetra në muaj.
Ndërsa Zade Kodra, gruaja nga Shkodra rrëfen për mikrofonin e “STOP” se jeton me dy fëmijë jetim pasi bashkëshorti i ka vdekur prej dy vitesh, ndërsa ndihma nga shteti është vetëm 20 mijë lekë të vjetra në muaj.
Ajo gjithashtu rrëfen se i është ndërprerë edhe ndihma ekonomike prej 34 mijë lekësh të vjetra që merrte më parë.
Këto janë vetëm dy raste të bëra mediatike, por sa histori të tilla ka në vendin tonë, sa familje të tjera shqiptare vuajnë nga skamja dhe mjerimi?
E ndërsa shteti kujtohet për ta vetëm në kohë fushate elektorale me premtime boshe… /tvklan.al
