Zgjedhjet e jashtëzakonshme janë e vetmja zgjidhje për t’u qetësuar shpirtrat e trazuar. Ky variant mund të ndodhë nëse “të tjerët” (LDK – Vetëvendosja, AAK dhe Nisma) pajtohen. Përsëritja e zgjedhjeve nuk mund të ndodhë vetëm me vullnetin e njërës palë. Njeriu i PDK-së, Kadri Vesli “Marrëveshjen e parimeve” të VLAN-it e cilëson si hap të rrezikshëm “kundër shtetit”. Demokracia është edhe matematikë si një e një që bëjnë dy.
Një ditë para “shfaqjes së madhe”, shtyhet vazhdimi i seancës konstitutive të Kuvendit për javën e ardhshme, të enjten e 18 shtatorit.
Lista Srpska ka kërkuar shtyrjen e seancës!
Flora (Brovina) nuk ua prishi. Në mbledhjen “urgjente” ishte i pranishëm edhe kryetari i PDK-së dhe kryeministri në ikje Hashim Thaçi.
Me palën tjetër, Flora nuk flet, ngase më herët për “punën e madhe” nuk e kanë dëgjuar, nuk i janë përgjigjur ftesës së saj, e kanë lënë të flasë me të vetët.
“Marrëveshjen parimore” të VLAN-it Kadri Veseli i PDK-së e cilëson hap të rrezikshëm për shtetin, cenim të Kushtetutës, ligjeve, demokracisë… Në një reagim të tij, prej nëntë pikash flet për “dëmin” që e shkakton kjo marrëveshje, të cilën një ditë më herët, në një emision televiziv bashkëpartiaku i tij Bajram Rexhepi e quan “letër e sajuar për dy orë”.
Të dy palët paralajmërojnë fitoren.
As ata të PDK-së e koalicioni i tyre as të tjerët nuk lëshojnë pe.
E para, PDK-ja s’e heq nga goja Kushtetutën, as vendimin e Kushtetueses, të cilën e konsideron se është në favor të saj.
Rivalët e partisë së Hashim Thaçit, vendimin e Kushtetueses e interpretojnë ndryshe. E përmendin pikën 127 të vendimi të diskutueshëm, e cila “çel udhë”. Kjo i bie se atyre nuk u mbyllet goja…
Pika 127 ka të bëjë me të ashtuquajturën “audiatur et altera pars” (Le të dëgjohet edhe pala tjetër).
Ndërkaq “të tjerët” që janë shumicë rrahin gjoks: Ne i kemi numrat, ne e marrim pushtetin”.
Çfarë do të ndodhë në seancën e ardhshme, vazhdimin e seancës konstitutive të Kuvendit?
Them “vazhdimin e seancës”, ngase më 17 korrik deputetët e kanë dhënë betimin, janë legjitimë. Nuk mund të nxirren “në aut” kaq lehtë siç mund të pandeh ndokush.
Acarimi i politikës, ngërçi i saj, amullia që po mbretëron i ngjet lojës së fëmijëve me symbyllur: “U ba, s’u ba, sytë i çela, kanë ta shoh përmas e vras”.
Ithtarët e “partisë së madhe” të Hashim Thaçit janë të vetëdijshëm se nuk i kanë numrat, se do të pësojnë fiasko. Por ata e luajnë lojën politike. Pikësynim kanë të shkojnë në zgjedhjet e jashtëzakonshme. Ky është i vetmi solucion i tyre. “Gjimnastika” politike në Kuvend është vetëm farsë. Ajo çfarë ndodhi deri më tani i ngjet një cirku me “salto mortales”.
A do të përsëritet sërish “salto mortales”?
Apo, ndoshta, politikanëve do t’u bjerë zhetoni, të mendojnë më tepër për shtetin, se pushtetin. Tjetër është shteti, tjetër pushteti.
Pa pëlqimin e dy palëve PDK dhe koalicionit të saj nga njëra anë dhe nga ana tjetër të katër subjekteve – LDK, Vetëvendosja, AAK dhe Nisma nuk shkohet në zgjedhjet e jashtëzakonshme. Pëlqimi i dy palëve është “conditio sine qua non”.
Cili do të jetë skenari i “filmit” të ardhshëm?
Këta të Hashim Thaçit e propozojnë kandidatin e tyre (profesorin e të drejtës kushtetuese, dr. Arsim Bajramin) për kryetar të Kuvendit. Nëse ky nuk i merr votat, mund ta propozojnë edhe kandidatin tjetër… Kryesuesja e seancës Flora (Brovina) nuk mund ta mbyllë seancën. Nëse ua mbyll gojën “të tjerëve” atëherë shkel në radhë të parë Rregulloren e punës, për të mos thënë Kushtetutën dhe vendimin e Kushtetueses.
Pala tjetër, “të tjerët” mund edhe të mos bëjnë potere, ta braktisin seancën dhe t’i thonë rivalit të tyre politik: Ne po ecim, po e lëshojmë seancën, t’i bëj ç’të duash, foli murit. Nuk i ke numrat as për forum!
Ka procedurë si bëhet konstituimi i Kuvendit.
Pushteti mund t’ua kufizojë të drejtën demokratike “të tjerëve”, deputetëve legjitimë, që të konstituojnë Kuvendin, ta zgjedhin kryetarin dhe nënkryetarët e Kuvendit. Ta formojnë edhe qeverinë.
Një veprim “të tjerët” mund ta bëjnë edhe jashtë ndërtesës së Kuvendit, mund ta bëjnë në ndonjë vend “më serioz”, jo në restorant, ndonëse edhe restoranti bëhet kuvend.
Është një thënie e njohur në gjyqësi. Aty ku janë gjykatësit, aty është gjyqi.
Gjykatësit i bëjnë dikujt gjyq, jo vetëm në ndërtesat e gjykatave, por edhe në hapësirat tjera, në ndonjë sallë të pallatit të kulturës, të sporteve e të ngjashme. Kështu ka ndodhur në praktikën tonë pas luftës, jo vetëm nga gjykatësit e UNMIK-ut, por edhe nga ata të EULEX-it.
Njësoj vlen thënia edhe në politikë. Aty ku janë deputetët, aty është Kuvendi.
Partitë politike bëjnë luftën e tyre për pushtet. Ky është roli i tyre.
Asnjë parti, pra as PDK, nuk e ka tapinë për Kosovën.
I ke votat, e merr pushtetin, s’i ke votat i bjen fyellit.
Kësaj i thonë demokraci.
Demokracia është edhe matematikë.
Politikanët nuk e kanë në qejf matematikën. Për ta një e një nuk bëjnë dy, po bëjnë katër, pesë, sa të donë ata.
E demokracia është sundim i ligjit.
Shumë fjalë u bë edhe për “kontrabandën” me deputetë. Shkroi shtypi se kush janë “diversantët” e LDK-së.
“Diversantët” e LDK-së u “çartën”. Njëri u mor me “gazetarët e SHIK-ut…” dhe “me motrat e tyre”. I dyti qiti flakë prej goje se “nuk bëhet me ata që tentuan ta vrasin…”. Tjetri u shpreh:”Edhe paret e dynjasë me m’i dhanë nuk bëhem me këta të PDK-së…”.
Drejtuesi i emisionit “Zona B”, të Klan Kosovës, më 10 shtator, bashkëbiseduesit e tij ministrit të Brendshëm Bajram Rexhepit i shtroi pyetjen se a frikësohet nëse ata të Vetëvendosjes së Albin Kurtit e arrestojnë. E përmendi arrestimin. Ministri në ikje u zu pisk, vuri buzën në gaz, tha: “Për ta arrestuar dikë ka procedurë, është gjyqi për këtë punë….”.
Në të mirë të shtetit, jo të pushtetit, politikanët me koka të nxehta është mirë të ftohen, të kendellen.
Më mirë sot.
Nesër bëhet vonë!
Të mbizotërojë arsyeja, jo emocionet.
