Sajmir Cullhaj do të qëndrojë në burg. Gjykata e pranoi pa rezerva kërkesën e prokurorisë për ta lënë në qeli 32 –vjeçarin që nisi drejt Anglisë me DHL 3 kallashnikovë, të çmontuar.
I riu nuk e ka pranuar akuzën dhe ka mohuar të jetë përfshirë në trafikun e armëve.
“Pakon ma dha shoku im i ngushtë për ta dorëzuar në DHL. Në tha ta çoja unë, pasi nuk kishte kohë. Unë nuk e dija çfarë kishte brenda”, u shpreh ai në gjykatë, raporton Lapsi.al. Miku i Cullhajt, N.F nga Durrësi, është i shpalluri në kërkim.
Cullhaj është identifikuar nga kamerat e sigurisë së zyrës së DHL-së dhe nga targat e makinës që kishte përdorur për të transportuar pakot.
Për dorëzimin e pakos është përdorur emri i një të moshuari nga Shijaku. Policia e ka gjetur dhe ka marrë në pyetje, por ai nuk njeh asnjërin nga dy të rinjtë. Nuk ka asnjë lidhje me ata dhe as me ngjarjen. Emri i tij është përdorur thjesht për të dorëzuar pakot dhe për të fshehur gjurmët.
Policia britanike, që është vënë në dijeni nga pala shqiptare, po përpiqet të zbulojë personat që do t’i prisnin kallashnikovët.
Autoritetet atje dyshojnë se armët do të përdoreshin në sulme terroriste ose nga bandat e krimit të organizuar.
