(I plotësuar) – Hedhja poshtë e një marrëveshje që është fryt i një komisioni dhe i një procesi plotësisht ligjor, që ka marrë bekimin e ekspertëve më të mirë të botës dhe aleatëve tanë, sipas presidentit Thaçi, e nxjerr në pah shtetin e Kosovës si të paaftë për të hyrë në marrëdhënie apo si të paaftë për të bërë marrëveshje me një shtet fqinj.
“Kjo e dëmton rëndë reputacionin e Kosovës në skenën ndërkombëtare.Ky është një precedent i rrezikshëm, pasi Kosova sot ka mbi 200 marrëveshje bilaterale të nënshkruara, e do të ketë edhe qindra të tjera në të ardhmen”, ka thënë Thaçi.
Ai ka pyetur se çfarë do të ndodhte me shtetin tonë, nëse çdo marrëveshje transparente e ligjore e nënshkruar nga institucionet kompetente shtetërore,do të vihej në pikëpyetje?!
“A do ta merrnin seriozisht Kosovën, shtetet e tjera apo palët e tjera, si shtet të pavarur e sovran, nëse nuk përmbushim kriterin e katërt të të qenit shtet?”, ka pyetur Thaçi, duke iu referuar aftësisë për të hyrë në marrëdhënie me shtetet e tjera dhe të qëndruarit prapa marrëveshjeve me ato shtete.
Thaçi: Me demarkacion janë shënjuar kufijtë me të cilët njihemi nga 112 shtete të botës
Presidenti i vendit, Hashim Thaçi, ishte i pari që foli në tryezën e sotme, ku po diskutohet për demarkacionin me Malin e Zi.
Ai në fillim të fjalimit të tij e vlerësoi lartiniciativën për të zhvilluar këtë debat, që Kuvendit të Kosovës, siç u shpreh presidenti Thaçi, por edhe tërë opinionit publik në Kosovë t’i prezantohen fakte rreth procesit të demarkacionit të kufirit të Kosovës me Malin e Zi.
“Shënjimi i kufijve është një nga kriteret kryesore të shtetësisë.Kjo është çështje e rëndësisë së veçantë për integritetin dhe sovranitetin territorial të shtetit tonë. Republika e Kosovës duhet të plotësojë këtë kriter dhe të bëjë përkufizim të qartë të territorit të saj me të gjitha vendet me të cilat kufizohet”, tha Thaçi.
Komisioni Shtetëror për Shënjimin dhe Mirëmbajtjen e Kufirit Shtetëror, i themeluar në vitin 2012, sipas presidentit Thaçi, në pajtim me përgjegjësitë dhe kompetencat kushtetuese e ligjore ka përfunduar punën e shënjimit të kufirit shtetëror të Kosovës me Malin e Zi.
“Në këtë proces, Kosova dhe Mali i Zi nuk kanë bërë marrëveshje për kufij të rinj, sepse në publik është keqinterpretuar kjo çështje, por vetëm i kanë shënjuar kufijtë ekzistues.Ky komision nuk ka pasur për qëllim të vendos në vend padrejtësitë historike të popullit shqiptar, por të shënojë në terren një kufi të pranuar tashmë ligjërisht si bazë e shtetit të Republikës së Kosovës”, tha presidenti Thaçi.
Ai theksoi se është i njëjti kufi në bazë të të cilit Kosova është njohur ndërkombëtarisht nga 112 shtete.
Është i njëjti kufi, sipas Thaçit, bazuar në të cilin jemi anëtarësuar në dhjetëra organizata ndërshtetërore, që kemi fituar gjyqin në Gjykatën Ndërkombëtare të Drejtësisë dhe tash paguajmë edhe pjesën që na takon të borxheve jugosllave në FMN dhe Bankë Botërore.
