Asambleisti deçanas, Imer Thaçi i cili sot bashkë me dhjetëra banorë të fshatit Llukë e Epërme, por edhe banorë tjerë të Deçanit tentuan të shkojnë në Kullë e Zhlep, por u penguan nga forcat malazeze, thotë se ndalimi ishte arbitrar.
Ai për lajmi.net ka thënë se malazezët kishin dalë me forca të shumta policore. “Kjo ndalesë ishte e padrejtë, pasi që ishte 5 km në thellësi të territorit të Kosovës, ani pse marrëveshja ende nuk është ratifikuar”, ka thënë Thaçi.
Sipas tij, ata në shenjë proteste kanë bllokuar për disa orë rrugën Rozhajë-Pejë.
Thaçi ka kërkuar nga deputetët e Kuvendit të Kosovës që mos ta ratifikojnë marrëveshjen e demarkacionit me Malin e Zi.
