Ministria e Jashtme ruse ka reaguar lidhur me tensionet e ndodhura ditën e djeshme në Mitrovicë.
Edhe pse qytetarët serbë sulmuan me grushte efektivët e policisë së Kosovës në Mitrovicën e Veriut pas aksionit kundër kontrabandës, ministria ruse mbrojti hapur qytetarët serbë.
Pas ndërmarrjes së aksionit qindra serbë janë mbledhur në pjesën veriore të Mitrovicës të cilët edhe kanë sulmuar policinë e Kosovës me grushte duke kundërshtuar aksionin.
Ky aksion, që ende po vazhdon është shtrirë në disa vende në Kosovë, përfshirë rajonin e Mitrovicës së Veriut dhe të Jugut, të Prishtinës dhe Pejës.
Reagimi i plotë i ministrisë ruse
“Forcat speciale të Kosovës, të armatosura me armë të rënda dhe automjete të blinduara, pushtuan përsëri zonat e populluara nga serbët në veri të Kosovës. Marrëveshjet e regjistruara vetëm disa javë më parë me pjesëmarrjen e BE-së, kur mezi ishte e mundur të parandalohej një konflikt në shkallë të gjerë, i provokuar fillimisht nga Prishtina, u shkelën. Këtë herë, dhjetëra njerëz u plagosën, një serb u shtrua në spital me një plagë me armë zjarri.
Kështu, kemi të bëjmë me një mosgatishmëri demonstrative të kosovarëve për të braktisur planet e tyre agresive që synojnë pastrimin e rajonit nga banorët joshqiptarë duke krijuar kushte të padurueshme jetese për ta.
Eshtë e qartë se “qeveria” radikale e Albin Kurtit nuk ndihet e detyruar nga asnjë detyrim, duke injoruar hapur edhe ata në Perëndim që vazhdojnë të lobojnë për legalizimin ndërkombëtar të pavarësisë ilegale të shpallur në mënyrë të njëanshme të Kosovës.
Ne dënojmë fuqishëm shpifjet e udhëheqësve shqiptarë të Kosovës, të cilët ndiejnë pandëshkueshmëri dhe përdorin çdo justifikim për të sjellë një rritje të serbofobisë në shoqërinë lokale në prag të zgjedhjeve komunale të 17 tetorit
Ne ju paralajmërojmë: kjo linjë e Prishtinës dhe reagimi i paqartë i “kuratorëve” të saj të jashtëm në mënyrë të pashmangshme provokojnë një rrëshqitje në konfrontim të hapur, shkatërrojnë parakushtet për vazhdimin e dialogut tashmë të ngecur të palëve,” shkruhet në shënim.
