Serbia është shteti që vazhdon të ketë pretendime e saja në Kosovën, duke përfshirë edhe hapësirën ajrore të saj.
Ky shtet ditë më parë i ka dërguar një kërkesë NATO-s që të marr nën kontroll hapësirën e lartë ajrore të Kosovës.
Një kërkesë të ngjashme autoritetet serbe i kanë proceduar në fund të vitit të kaluar edhe Bashkimit Evropian, me synimin që të marrin kontrollin e hapësirës ajrore të ulët të të Kosovës, pas përfundimit të mandatit prej pesë vjetësh të Hungarisë.
Por, sipas Mentor Vrajollit nga Qendra Kosovare e Sigurisë (QKSS), pretendimet e Serbisë, nuk janë të papritura edhe pse sipas tij, gjasat që Serbia të marr kontrollin e hapësirës ajrore të Kosovës janë të pakta.
“Pretendimet e tilla te kryeministrit serb nuk janë diçka e papritur. Është përpjekje e kamotshme e Serbisë që në çfarëdo mënyre ta kthej prezencën e saj ne Kosove. Megjithatë, nga këndvështrimi i Kosovës çfarëdo marrëveshje e NATO-s me Serbinë sa i përket dhënies autoriteteve serbe në ruajtjen e aspekteve te sigurisë në Kosovë do të nënkuptonte ndërrim pozicionesh nga ana e NATO-s ne raport me Kosovën gjë që për momentin nuk pritet te ndodh”, ka thënë Vrajolli për lajmi.net.
Megjithatë sipas tij, këto pretendime ngjallin ndjenja të pasigurisë tek qytetarët e Kosovës, që siç shprehet Vrajolli, janë të kuptueshme, pasi qe institucionet e Kosoves edhe me tutje si duket po dështojnë te arrijnë të bëjnë hapat e duhur sa i përket themelimit te sektorit mbrojtës te saj.
“Qeveri e Kosovës dhe Kuvendi i Kosovës edhe këtë vit dështuan që ta përmbyllin transformimin e FSK ne Forca te Armatosura, si dhe përgatitjen e kapaciteteve vendore për te u ballafaquar me kërcënimet potenciale qe Kosovën e sfidojnë”.
“Madje, mosthemelimi i sektorit të mbrojtës po ju mundëson edhe akterve të jashtëm me pretendime jomiqësore ndaj Kosovës siç është Serbia qe shfrytëzojnë vakumin institucional për të kërkuar rikthimin e influencës se saj ne Kosove”, ka thënë ai për lajmi.net.
Vrajolli ka vlerësuar së institucionet e Kosovës duhet të përgatiten që siguria nacionale të mos mbetet në dorën e ndërkombëtarëve.
“ Në rast se NATO e sheh te nevojshme përmbylljen e mandatit te saj ne Kosove dhe institucionet e Kosovës edhe me tutje nuk nuk janë te gatshme të zëvendësojne këtë mision, mundësia qe akter te jashtëm, përfshirë këtu edhe Serbinë, te gjejnë shprehje ne marrjen e kompetencave te caktuara te KFOR-it nuk mund te përjashtohet tërësisht. Kështu qe është me rendësi qe Kosova të themeloj sektorin e saj te mbrojtjes sa me pare dhe te mos presin qe siguria e saj nacionale edhe me tutje te mbetet ne duart e ndërkombëtareve”, ka vlerësuar ai.
Hapësira e ulët ajrore e Kosovës shtrihet në lartësinë deri në 6,500 metra, e cila kontrollohet nga autoritetet e Kosovës. Kjo hapësirë shërben për aterrime dhe ngritje nga aeroporti, për kompanitë ajrore që e kanë destinacion Prishtinën apo që nisen nga Prishtina.
Drejtori i Autoritetit të Aviacionit Civil të Republikës së Kosovës, Dritan Gjonbalaj, pretendimeve të Serbisë që ta marrë nën kontroll këtë hapësirë, Gjonbalaj u përgjigjet negativisht.
“Ne kemi një Agjenci kompetente e cila është duke i dhënë të gjitha shërbimet e kontrollit të trafikut ajror dhe shërbimet tjera përcjellëse në hapësirën e ulët ajrore të Republikës së Kosovës, nën 6,500 metra. Pra, kjo është një pikë e padiskutueshme”, ka thënë Gjonbalaj, ditë më parë për media.
Përveç hapësirës deri në 6,500 metra, ekziston edhe ajo mbi këtë zonë, e njohur si hapësira e lartë ajrore, e cila me vendim të NATO-s, i është deleguar Hungarisë, përkatësisht Hungaro Control-it.
