Ky është ndoshta tatuazhi më i madh që bën një tifoz i kombëtares, i cili ka duruar për orë të tëra “penelin” e personit që ka marrë përsipër të skalisë me tatuazh këtë moment historik për futbollin tonë, por edhe për kombin
Alfred Lleshi, Telesport
Kuqezinjtë e kombëtares janë heronjtë e vërtetë të kombit shqiptar. Kjo u duk qartë në pritjen madhështore që iu bë atyre pas kthimit nga Armenia, ku vulosën suksesin historik, kualifikimin në finalet e “Euro 2016”.
Titujt e marrë nga Ekzekutivi dhe Presidenti Shqiptar nuk janë gjë para urimeve e ngrohtësisë së tifozëve, që i mbështetën të besuarit e Xhani de Biazit ngado, duke e përmbushur më së miri funksionin e të ashtuquajturit “lojtari i 12-të” i kombëtares.
Në fakt, atyre iu thye pak zemra nga humbja e 8 tetorit në “Elbasan Arena”, ndaj Serbisë, por nuk e braktisën ekipin që bashkon mbarë kombin.
Nëse para ndeshjes me serbët, një tifoz ultras nga Gjakova e skaliti në pulpën e këmbës së tij grushtin e Lorik Canës në Beograd, në formë tatuazhi, një tjetër ka shkuar më tej me “çmendurinë” e tij në këtë drejtim, pas sigurimit të finaleve të “Euro 2016”. Ai ka bërë tatuazh tërë kombëtaren, më saktësisht një foto të kuqezinjve në Rinas, pas kthimit nga Jerevani.
Ky është ndoshta tatuazhi më i madh që bën një tifoz i kombëtares, i cili ka duruar për orë të tëra “penelin” e personit që ka marrë përsipër të skalisë me tatuazh këtë moment historik për futbollin tonë, por edhe për kombin.
Përveç formacionit titullar, sikurse duket në foto, në shpinën e tifozit është bërë tatuazh edhe njeriu kryesor i triumfit, trajneri De Biazi.
Kujtojmë se ndeshja me Serbinë, po ashtu, zgjoi imagjinatën e tifozëve kuqezinj, veç të tjerave, për gjetje interesante, nga më të ndryshmet, me të cilat donin të dëshmonin dashurinë për kombëtaren. Njëkohësisht, ata donin ta saklitin në mendje, po e po, por edhe në trup antipatinë, më e pakta, për serbët, pas asaj që ndodhi në Beograd, 14 tetorin e kaluar.
Dy ditë para “ndeshjes së shekullit”, sikurse ishte konsideruar nga shqiptarët dueli me Serbinë, një tifoz (Lekë Dobruna nga Gjakova) ka hedhur në Facebook tatuazhin e bërë një njërën pulpë të këmbës. E çfarë është aty, do të thoni ju?
Hiç më pak se grushti i Lorik Canës te koka e tifozit serb, i cili hyri në fushë 14 tetorin e kaluar, goditi me karrige kokës Bekim Balajn, ndërsa kapiteni kuqezi u vërsul në mbrojtje të bashkëlojtarëve si “shqiponja” që vien nga qielli.
Ai moment ka mbetur i pashlyer në memorien e tifozëve shqiptarë, të cilët nuk harrojnë as koret raciste, shprehjet “vritini, vritini shqiptarët”, apo dhunimin e goditjet fizike të kuqezinjve tanë, brenda e jashtë tapetit të blertë.
Edhe “njeriu i dronit”, Ballist Morina, pozoi duke puthur grushtin e Lorik Canës para ndeshjes në Kopenhagen, më 4 shtator, çka irritoi pa masë trajnerin Morten Olsen, i cili nuk la pa e denoncuar këtë lloj sjelljeje në konferencën për shtyp.
Cana ka disa tatuazhe me kuptime kombëtariste në trupin e tij, por tashmë ai vetë, duke grushtuar tifozin serb, gjendet në trupin e një tifozi kuqezi, çka me gjasë do të kthehet në një “markë” për shumë veta, para e pas ndeshjes me Serbinë.
