Zhvillimi ekonomik, hapja e vendeve të punës, liberalizimi i vizave, kanë qenë disa nga premtimet e mëdha që kanë dhënë dy partitë në qeverisje, e të cilat nuk janë përmbushur.
Ditë jo të mira për kryeministrin Mustafa ishin parë që në fillim të mandatit të tij, ku u përball me protesta të mësimdhënësve, veteranëve e ikjen masive të qytetarëve nga vendi, për të vazhduar edhe më ato të partive opozitare.
Analisti politik, Imer Mushkolaj thotë se kjo qeveri mandatin e saj e ka filluar me krizë duke e vazhduar me krizë dhe më gjasa që ta përfundojë në të njëjtën mënyrë.
“Gjatë këtyre dy viteve Qeveria më shumë është marr me menaxhimin krizave shumicën e të cilave vetë i ka shkaktuar se sa që është marr me realizimin apo përmbushjen e planit apo programit qeverisës dhe përmbushjen e premtimeve të cilat z. Mustafa dhe partneri i tij i koalicionit PDK i ka dhënë gjatë fushatës zgjedhore”, ka vlerësuar Mushkolaj.
Ai po ashtu për lajmi.net ka thënë se ekzekutivi ka dështuar në përmbushjen e prioriteteve që kanë të bëjnë me zhvillimin ekonomik, zbutjen e papunësisë, e në fusha tjera të rëndësishme siç janë arsimi, shëndetësia dhe lufta kundër korrupsionit.
Mushkolaj ka vlerësuar se edhe reforma fiskale që është proklamuar si sukses nga kjo qeveri, më shumë ka qenë në favor të bizneseve, se të qytetarëve.
Sipas tij, edhe ato pak të arritura që janë bërë gjatë këtyre dy viteve, kanë mbet nën hijen e dy temave atë të Asociacionit dhe Demarkacionit që sipas Mushkolaj, Qeveria më vetëdije është fundosur në këto dy problematika.
“Edhe nëse ka pasur ndonjë të arritur që është realizuar nga kjo qeveri, është e pamundshme që të mos ketë edhe aspekte pozitive por këto kanë mbet në hije e këtyre dy çështje politike, Asociacionit dhe Demarkacionit me Malin e Zi, të cilat ende nuk janë zgjidhur”, është shprehur Mushkolaj.
Disa nga të arriturat më të cilat mburret kryeministri Mustafa gjatë mandatit të tij, janë nënshkrimi i Marrëveshjes së Stabilizim Asociimit, rekomandimi për heqjen e vizave, pranimi në UEFA e FIFA.
Qeveria Mustafa ishte votuar nga Kuvendi i Kosovës më 9 dhjetor të vitit 2014, gjashtë muaj pas mbajtjes së zgjedhjeve parlamentare. Në Kuvend kabineti qeveritar i Isa Mustafës kishte marrë 73 vota pro, 38 kundër dhe 2 abstenime.
