Krerët e institucioneve më të larta duhet të dalin nga pozicionet e tyre të barrikaduara për t’i lënë hapësirë një zgjidhjeje të duhur politike për Demarkacionin dhe Asociacionin.
Rrjedhimisht edhe Komisioni qeveritar për shënjimin e kufirit duhet të shpërbëhet për t’i lënë vend krijimit të një komisioni të ri me ekspertë të pavarur.
Kështu ka deklaruar në intervistën lideri i Këshillit Kombëtar të “Nismës për Kosovën”, Jakup Krasniqi, i cili situatën aktuale politike e sheh shumë të komplikuar.
Ndërkohë, duke folur për tensionimin e situatës, ai ka thënë se gjuha e përdorur nga krerët e shtetit dhe angazhimi i tyre që demarkacioni të ratifikohet kështu si është, për të dyshuar se ata po mbrojnë interesa të tyre personale e jo interesat e vendit. “Kjo bindje e krijuar, pa dyshim që ndikon në ngritjen e tensioneve”, ka thënë Krasniqi, ish-kryeparlamentar i Kosovës në dy legjislatura.
Ndërsa sa i përket vizitës së nënkryetarit të SHBA-së, Joe Biden, Krasniqi ka thënë se ishte shumë e rëndësishme goditja e korrupsionit që ai e bëri në fjalimin e tij.
