Megjithëse kundërshtarë në pothuajse gjithçka, akademiku dhe intelektuali i angazhuar Artan Fuga dhe kryeministri Rama më në fund kanë rënë dakord për diçka. Fjala është për zgjedhjet farsë që po zhvillohen në Akademinë e Shkencave, ku kryetari konkurron për nënkryetar dhe nënkryetari për kryetar. Pak ditë më parë, duke lënë mënjanë mospajtimet që janë bërë të dukshme që prej miratimit të reformës në arsimin e lartë e që kulmuan me mbështetjen që Fuga i dha çadrës së opozitës, akademiku dhe pedagogu i drejtoi një letër kryeministrit (lexo shkrimin poshtë) ku i kërkonte që shteti të mos financonte punën e rreme shkencore dhe mendësinë klanore të një institucioni të atrofizuar.
Kaloi pak kohë dhe Rama u përgjigj në mënyrën e tij. Sot në mëngjes, pikërisht në ditën që mbahen zgjedhjet e Akademisë së Shkencave, kryeministri postoi një status ku duket qartë se ai del në mbështetje të tezave të Fugës. “Nëse nuk reformohet, Akademia e Shkencave nuk do marrë më asnjë qindarkë nga buxheti e do të duhet të dorëzojë godinën! Prandaj #StopFarsës”, shkruante Edi Rama në Facebook e tij.
Nuk vonoi dhe Artan Fuga si një xhentëlmen i vërtetë, duke lënë pas shpine mëritë e vjetra, u përgjigj flakë për flakë.
“Falenderoj jashtë çdo konteksti politik, si anëtar i Akademisë të Shkencave, kryeministrin Edi Rama për pozicionin e drejtë të mbajtur sot në mëngjes, in extremis, dy orë përpara farsës të lemerisshme në Akademinë e Shkencave ku po kërkohet t’i vihet kapak gjoja demokratik me zgjedhje farsë degradimit të saj.
Unë sikurse e kam shprehur modestisht, besoj fort se Akademia e Shkencave e Republikës së Shqipërisë mund të reformohet, të bëhet një institucion splendid që të rrezatojë në diturinë dhe shkencën e shqiptarëve, e pavarur, e lirë, por efikase dhe në partneritet me të gjitha agjencitë që janë për një Shqipëri të emancipuar.
Jo, ne nuk i duam ato paré nga buxheti për xhepat tanë. Ose të reformohemi ose ta kyçim derën me turp!”, shkroi ai.
Kërcënimi elektronik i Ramës për të ndaluar zgjedhjet farsë në Akademinë e Shkencave, nuk e pengoi Gudar Beqirajn të zgjidhej sot kryetar i saj dhe as Myzafer Korkurtin të kapte postin e zv kryetarit. Por një gjë është e qartë, që ashtu sikurse ndodh rrallë në Shqipëri, ajo që po ngjet në tempullin shqiptar të shkencës, arriti të bashkojë dy kundërshtarë pothuajse totalë, Ramën dhe Fugën.
