Nuk kanë fund skandalet në Ministrinë e Shëndetësisë! Ministri Ilir Beqaj po heq nga detyra e ushtrimit të mjekut profesorët me dhjetëra vite përvojë pune, duke i lënë spitalet pa mjekë. Rasti konkret, që dëshmon një skandal të tillë të konsumuar nga Ministria e Shëndetësisë, është pushimi nga puna i doktorit Kim Drrasa, që mban titullin “Profesor i asociuar”, si mjek urolog në Poliklinikën Qëndrore të Specialiteteve Nr: 3 në Tiranë. Ministri Ilir Beqaj e ka shkarkuar nga detyra me pretekstin se doktori Kim Drrasa ka plotësuar moshën për të dalë në pension dhe nuk mund të jetë pjesë e personelit të Poliklinikës Qëndrore në Tiranë, për të ushtruar detyrën si mjek urolog. Por në fakt e vërteta është krejt tjetër. Ministri Beqaj ka shkelur ligjin për shëndetësinë me të dyja këmbët, duke shkarkuar nga puna një mjek profesionist me përvojë. Sipas një ankese të ardhur në gazetë, mos e daljes në pension e profesorëve është 68 vjeç dhe jo 65 vjeç.
Atyre mbi 65 vjeç nuk u lejohet të japin mësim, por nuk u ndalohet të ushtrojnë të drejtën e profesionit. Ministri në shkresën e saj pretendo se duke qenë se profesori ka mbushur moshën 65 vjeç, ai duhet të dalë në pension. Mirëpo ligji për arsimin e lartë e ka specifikuar se ata dalin në pension në moshën 68 vjeç dhe pas moshës 65 vjeç nuk mund të shërbejnë si pedagogë të brendshëm. Drejtoresha e Poliklinikës, Valdete Malaj, në një prononcim për gazetën “Sot”, ka sqaruar se i ka dërguar një shkresë Ministrisë së Shëndetësisë se si duhet të veprohet me një mjek që mban titullin “Profesor i asociuar”, kur ai ka mbushur moshën 65 vjeç. “Doktor Kimi ka dalë në pension. Meqenëse kishte titullin profesor, ne kemi dërguar një shkresë në ministri për sqarim. Kemi kërkuar një sqarim në lidhje me titullin profesor, gjë që te ne nuk e ka sjellë, megjithatë ne e kemi marrë të mirëqënë, se ndoshta për shkak të procedurave nuk ka ardhur akoma kartoni. Ne na ka ardhur shkresa nga ana e Ministrisë e Shëndetësisë, ku na kërkohet që doktor Kimi të dalë në pension. Nga ana akademike mund të japë mësim, por jo në punë si mjek. Unë nuk kam kompetencë as ta mbaj në punë dhe as ta heqë nga puna kur del në pension. Shtyrje bën vetëm ministria”, sqaron drejtoresha Valdete Malaj.
Ja “gafa” e ministrit Beqaj
Në përgjigjen e shkresës së dërguar nga drejtoresha Malaj për sqarim, Ministria e Shëndetësisë thotë se doktor Kim Drrasa që mban titullin “Profesor i asociuar” nuk mund të jetë pjesë e personelit të kësaj poliklinike, pasi ka mbushur moshën e pensionit, 65 vjeç. “Në përgjigje të shkresës tuaj me numër 525 prot.datë22.9.2016, “Kërkesë për informacion”, për daljen ose jo në pension të Z.Kim Drrasa, mjek urolog, njoftojmë se bazuar në nenin 65, të ligjit 80/2015 “Për arsimin e lartë dhe kërkimin shkencor në institucionet e Arsimit të Lartë në Republikën e Shqipërisë”, personeli akademik që mban titullin “Profesor” shërben në detyrë deri në moshën 68 vjeç, ndërsa personeli me titullin “Profesor i asociuar” shërben në detyrë deri në moshën 65 vjeç”. Në kuptim të ligjit dhe të nenit të sipërcituar, kemi të bëjmë me kohëzgjatjen e punësimit të personelit akademik në një institucion të arsimit të lartë dhe jo në një qendër shëndetësore si në rastin që përmendet në shkresën tuaj. Nga sa më sipër Z.Kim Drrasa, mjek urolog pranë Poliklinikës së Specialiteteve nr.3, Tiranë, plotëson kushtet për pension pleqërie”, thuhet në përgjigjen e Ministrisë së Shëndetësisë.
Por ministri Beqaj ose ka bërë një gafë të madhe nga padija ose ka vepruar qëllimisht. Ligjit të cilit i referohet nuk ka të bëjë me ushtrimin e detyrës si mjek, por me detyrën akademike të mësimdhënies. Pra, sipas nenit 64 të ligjit të sipërcituar, “Personeli akademik, që mban titullin “Profesor i asociuar”, shërben në detyrë deri në moshën 65 vjeç. Mbështetur mbi nevojat e institucionit të arsimit të lartë dhe me pëlqimin e tij ai mund të shërbejë në detyrë edhe pas moshës së lartpërmendur përmes kontratave me kohëzgjatje deri në një vit, të përsëritshme, sipas përcaktimeve në statutin e institucionit të arsimit të lartë”. Këtu sqarohet qartë se doktorit Kim Drrasa i lejohet të japë mësim në universitet deri në moshën 65 vjeç dhe në rast nevoje atij i zgjatet kontrata, dhe nuk ka të bëjë me ushtrimin e detyrës si mjek në Poliklinikën Qendrore Nr: 3. Me pak fjalë, doktori Kim Drrasa mund të vijojë ta ushtrojë detyrën si mjek në këtë qendër apo kudo tjetër. Aktualisht, doktori Kim Drrasa përveç mësimdhënies është edhe mjek në QSUT, por vetëm në këtë Poliklinikë nuk i lejohet të punojë. Duket se kjo “gafë” ligjore është e qëllimtë, për të larguar me pa të drejtë nga puna mjekun Drrasa.
