Gjatë 45 kontrolleve në mjedise të grupit, policia greke ka sekuestruar 433 kg 400 gramë marijuanë, 6 kg hashash i kultivuar në mjedis të mbyllur, 30 mijë euro, 10 makina, 1 furgon dhe 2 motorë, ndërkohë që nga hetimet rezulton se grupi ka trafikuar dhe shpërndarë 1 ton 235 kg marijuanë, 1 kg 600 gramë kokainë, 500 gramë heroinë, 500 gramë MDMA dhe 8 kg hashash të kultivuar në mjedis të mbyllur, duke arritur të qarkullojë kështu një shumë që policia greke e llogarit në mbi 19 milionë euro. Sipas burimeve policore greke, sasia më e madhe e drogës vinte nga Shqipëria, ndërkohë që një pjesë kultivohej në Greqi, kryesisht në mjedise të mbyllura.
Pakot e drogës që dërgoheshin nga Shqipëria në secilën prej tyre kishte mbi të edhe një kartë bixhozi për të treguar autorësinë. Mësohet se 1 kg marijuanë në Greqi shitej nga 12002300 euro.
SKEMA E BANDES
Sipas policisë greke, grupi funksiononte në këtë mënyrë: Në nivelin e parë qëndronte “Genti”. Poshtë tij ishin 4 shtetas shqiptarë, më pas 3 shqiptarë e 4 grekë, në nivelin e katërt 3 grekë merreshin me trafikun në kufirin grekoshqiptar, ndërsa në nivelin e pestë ishin 17 shqiptarë, 1 grek, 1 bullgar e 1 rumun, që kryenin magazinimin e drogës.
Në nivelin e gjashtë, 6 shqiptarë, 3 grekë dhe 1 bullgar, shpërndanin drogën kundrejt shitësve të vegjël dhe në nivelin e fundit ishin gjithë tregtarët e sasive të vogla të drogës në qendër të Athinës, kryesisht shtetas afrikanë. Mendohet se grupi kontrollonte rreth 35% të tregut të narkotikëve në Athinë, duke bërë që goditja e tij të ulë ndjeshëm shitjen e drogës në këtë zonë. Policisë greke iu desh rreth 8 muaj të hetonte grupin. Gjashtë oficerë grekë, pjesë e operacionit, kryen filmime gjatë veprimtarisë së të dyshuarve.
Vrasja e Dervishit
Mësohet se hetimet policore kanë zbuluar një lidhje të mundshme të grupit me vrasjen e 32vjeçarit shqiptar Rigert Dervishi, në Keratsini të Athinës, më 13 nëntor të këtij viti. Sipas Policisë, Dervishi ishte drejtues i mjetit, por është vrarë gabimisht, pasi objekt i atentatit ishte një 36vjeçar shqiptar, pasagjer në mjet, të cilin banda kishte tentuar ta vriste me bombë me telekomandë, më 14 shtator 2016, për një borxh.
Dervishi, i cili punonte në ndërtim, prind i 3 fëmijëve, njihej si familjar i rregullt, ndërkohë që pasagjeri 36 vjeçar ishte me precedentë në fushën e trafikut të drogës. Ai u përpoq ta mashtronte policinë, duke thënë se para vrasjes Rigerti kishte pasur një zënkë, ndërkohë që nuk rezultoi e vërtetë. Gjatë atentatit të parë me bombë me telekomandë, 36vjeçari kish ngelur i plagosur bashkë me gruan dhe vajzën 5 vjeçare, që ndodheshin në makinë me të.
