Shtyrja e vizitës së Kryeministrit Edi Rama në Beograd është cilësuar nga Ambasadori gjerman në Tiranë Helmut Hoffmann si një përpjekje e të dy vendeve për qetësim të situatës dhe pajtim.
Ndërsa e konsideroi si të rëndësishme një vizitë të tillë, diplomati gjerman tha se është e zgjuar të shtysh zhvillimin e një vizite të planifikuar.
“Ne e e kuptojmë se në rrethana fatkeqe është e diçka e zgjuar të shtysh një vizitë të rëndësishme. Ne ndajmë pikëpamjet e shumë të tjerëve se është e rëndësishme për të gjithë që të vazhdojmë të angazhohemi në mënyrë konstruktive dhe kjo është mënyra e vetme për rajonin që të ketë progres”,theksoi ai.
“Shqipëria vlerësohet për rolin e moderuar që ka luajtur për shumë vite në rajon. Në këto ditë jo fort emocionuese mund ta shohësh se asnjë gjë nuk merret gratis, por duhet përpjekje nga të gjitha palët për pajtim. Në rrethana fatkeqe është e zgjuar të shtysh një vizitë të rëndësishme.
Është e rëndësishme që të vazhdojmë të angazhohemi në mënyrë konstruktive. Ditët dhe javët në vazhdim do përdoren në mënyrë domethënëse.
Kjo ngjarje na ndihmon për të parë prioritete strategjike dhe si do jemi të angazhuar në të”, u shpreh Hoffman.
Në lidhje me bashkëpunimin mes Shqipërisë dhe Gjermanisë, Ambasadori gjerman në Tiranë vlerësoi bashkëpunimin me Qeverinë shqiptare në projekte të rëndësishme si ato për energjinë.
“Angazhimi gjerman është rezultat i përpjekjeve të vazhdueshme mes dy qeverive që takohen në mënyrë të rregullt. Shqipëria mund të luaj një rol të rëndësishëm në projekte të përbashkëta. Kemi rënë dakord në shumë marrëveshje me Gjermaninë.
Marrëveshja për energjinë dhe ndërtimi i linjës së energjisë me Malin e Zi dhe Kosovën e cila është strategjike. Kjo linjë strategjike u vendos në punë për të furnizuar shumë shqiptarë me energji. Që nga viti 1992 janë rregulluar dhe rehabilituar sistemi i furnizimit me ujë duke shpenzuar miliona euro për qytetarët shqiptarë. Po punojmë shumë afër me partnerët tanë shqiptarë dhe vlerësojmë bashkëpunimin me ta”, tha Hoffmann.
Në kuadrin e Tetorit Gjerman 2014, 21 Tetori është zgjedhur si dita e bashkëpunimit shqiptaro-gjerman për zhvillim. Në këtë kuadër në mjediset e Galerisë Kombëtare të Arteve në Tiranë, në prani të kryeministrit Edi Rama, ministrave të kabinetit si dhe Ambasadorit gjerman në Tiranë, Hellmut Hoffman janë prezantuar projektet që Gjermania planifikon të zbatojë së bashku me institucionet partnere shqiptare në të ardhmen.
Shqipëria po ecën përpara në rrugën drejt Bashkimit Europian dhe Gjermania ka mbështetur zhvillimin e qëndrueshëm të Shqipërisë që prej vitit 1988, kur bashkëpunimi dypalësh u vendos mes dy vendeve.
Prej më shumë se 25 vitesh, në emër të Qeverisë Federale Gjermane, GIZ (Deutsche Gesellschaft für Internationale Zusammenarbeit GmbH) dhe KfË kanë mbështetur në mënyrë aktive projekte zhvillimi në të gjithë Shqipërinë.
