Mediat serbe janë zemëruar me Ministrinë e Punëve të Jashtme të Greqisë, e cila i ka bërë ftesë ministrit të Jashtëm të Kosovës, Hashim Thaçi, që ta vizitojë Athinën.
Gazeta beogradase “Blic” citon komunikatën e Ministrisë së Punëve të Jashtme të Greqisë, në të cilën konfirmohet se Thaçi është ftuar për vizitë në Athinë dhe se shefi i diplomacisë greke, Nikos Kotzias, ka thënë se vendi i tij e mbështet anëtarësimin e Kosovës në organizatat ndërkombëtare.
“Ministri Kotzias e ka ftuar kolegun e tij Hashim Thaçin për vizitë në Athinë dhe ka shprehur përkrahjen e Greqisë për përpjekjet e Kosovës që të anëtarësohet në organizatat ndërkombëtare, në bazë të së drejtës ndërkombëtare e për të mirën e stabilitetit të rajonit, duke theksuar se synim i përbashkët është integrimi i rajonit të Ballkanit në BE”, e citon “Blic” komunikatën e MPJ të Greqisë nga takimi i ministrit Kotzias me Kryeministrin e Kosovës, Isa Mustafa dhe me ministrin e Jashtëm, Hashim Thaçi, në Nju Jork.
“Blic” citon edhe pjesën e komunikatës ku thuhet se të dyja palët (Kotzias dhe Mustafa e Thaçi) “janë pajtuar të vazhdojnë thellimin e bashkëpunimit midis dy vendeve dhe të formojnë grupe të ekspertëveqë do të ndihmojnë harmonizimin e ligjeve të Kosovës me vlerat juridike të BE-së”.
Gazeta serbe e konsideron këtë si dëshmi se Athina po e përgatit terrenin për njohjen formale të shtetit të Kosovës.
“Komunikata që është publikuar në faqen e internetit të Ministrisë së Punëve të Jashtme të Greqisë vërteton tezën se Athina zyrtare po e përgatit terrnin për njohjen formale të Kosovës”, shkruan “Blic”.
Kështu i shohin lëvizjet politike të Qeverisë aktuale të Greqisë edhe disa analistë politikë serbë.
Dragomir Angjelkoviq ka thënë se Kryeministri i Greqisë, Alexis Tsipras, “ka shprehur gatishmërinë ta njohë Kosovën” dhe ka parashikuar se “kjo do të ndodhë para se të bëhet një vit”.
Analisti tjetër Branko Radun ka thënë gjithashtu se Qeveria aktuale greke është afër njohjes së pavarësisë së Kosovës.
Edhe eksperti britanik për Ballkanin, Xhejms Ker Lindzi, ka vënë re sinjale që shpien drejt njohjes së Kosovës nga Athina zyrtare. Duke komentuar komunikatën greke nga takimi I ministrit Kotzias, ka thënë se kjo është edhe një dëshmi më shumë se “Greqia e njeh Kosovën në çdo mënyrë, përveçse formalisht”.
Mundësia që Greqia ta njohë shtetin e Kosovës është përmendur qysh në muajin korrik, gjatë vizitës së ministrit të Jashtëm grek, Nikos Kotzias, në Prishtinë. Deklarata e atëhershme e tij kishte nxitur reagime të fuqishme në Beograd.
