Gjykata kishte paraparë të mbante shqyrtimin gjyqësor ndaj të akuzuarit Mikel Qupi, por seanca nuk u zhvillua meqë mungoi dëshmitari bashkëpunues Gramoz Nukshiqi që jeton në Shqipëri, ndërsa pretendohet të jetë njëri nga personat e paguar për të kryer vrasjet.
Dëshmitari bashkëpunues nga ana e gjykatës është ftuar në mënyrë të rregullt përmes Ministrisë së Drejtësisë nga Divizioni për Bashkëpunim Juridik Ndërkombëtar, por nuk është mundësuar prania e tij.
“Ne rrugë tjetër nuk kemi përveç se Ministrisë së Drejtësisë-Divizionit për bashkëpunim Juridik Ndërkombëtar që ta sigurojmë të njëjtin. Duhet ta pyesim prokurorin pse nuk është prezent sot dëshmitari bashkëpunues meqë është caktuar si dëshmitar bashkëpunues nga ana e prokurorit” tha kryetari i trupit gjykues Gëzim Pozhegu.
Prokurori i Prokurorisë Speciale, Ali Rexha tha se bashkë me hetuesit e tij nuk kanë mundur ta sigurojnë praninë e Gramoz Nukshiqit në gjykatë.
“Përkundër përpjekjeve nuk kam mundur me siguru asgjë pasi që hetuesit që janë duke u marrë me këtë rast nuk kanë informata të tjera edhe ata disa janë në trajnime, kështu që nuk kemi mund të sigurojmë kurrfarë informate konkrete pse nuk ka ardhë dëshmitari ” tha prokurori Rexha.
Avokati Mustafë Radoniqi, përfaqësuesi i autorizuar i të dëmtuarës MimozaKusari-Lila, tha se ka informata që organeve të rendit në republikën e Shqipërisë nuk u është kërkuar sjellja e Gramoz Nukshiqit.
“E dëmtuara Mimoza Kusari-Lila ka qenë në Shqipëri dhe është interesu që të kuptojë se a është dërgu kërkesa për sjelljen e dëshmitarit në këtë gjykim dhe ajo është informu se nuk ka kurrfarë kërkese të dërguar nga ministria,” tha avokati radoniqi, duke kërkuar që ky fakt t’i bëhet i ditur Ministrisë së Drejtësisë.
Ndërkaq i dëmtuari në këtë rast Prenk Radi u shpreh shumë i zhgënjyer me pafuqinë e sistemit të drejtësisë për mosprezencën e dëshmitarit bashkëpunues.
“Nëse nuk mundeni ju si shtet, si gjykatë, si Prokurori Speciale e Kosovës me një shtet që thuja jemi një shtet me pru një person në mënyrë juridike ma jepni lejen mu, nesër keni me pas njerin në gjyq, unë e bi në mënyrë private. Atëherë mos më thirrni ma, këtu ka zvarritje, këtu ka dallavere,” tha i dëmtuari Radi.
Seanca e radhës është caktuar të mbahet me 15 nëntor të këtij viti.
Mikel Qupi akuzohet se u mor vesh me dy shtetas të Shqipërisë për vrasjen e Mimoza Kusari-Lilës gjatë muajit korrik të vitit 2015.
Për vrasjen e kryetares së Gjakovës, Qupi sipas prokurorisë u premtoi 300 mijë euro dy shtetasve shqiptarë.
Qupi ka mohuar fajësinë në vazhdimësi gjatë procesit gjyqësor.
