Tregu i hidrokarbureve vazhdon të mbetet një nga më problematikët për qytetarët shqiptarë. Megjithë ankesat dhe denoncimet e vazhdueshme të qytetarëve dhe mediave ndaj grabitjes dhe abuzimit të përhershëm të këtij biznesi me sasinë dhe cilësinë, instancat shtetërore përgjegjëse duket se kanë mbyllur sy e veshë dhe janë bërë “palë” me abuzuesit. Gazeta “SOT” ka denoncuar prej 2 ditësh skandalin më të fundit që po ndodh në tregun shqiptar të karburanteve, që është dhe hedhja në treg e naftës me squfur mbi normat e lejuara. Bëhet fjalë për një kompani të re në treg, e cila ka hapur një numër të konsiderueshëm pikash të tregtimit të karburanteve. Këto pika furnizojnë me karburant qindra mijëra makina në ditë në të gjithë vendin, çka përbën një shqetësim madhor jo vetëm për automjetet që mbushen me naftë me squfur, por dhe për ndotjen tmerrshme që shkaktojnë në mjedis nëpërmjet gazrave helmuese, duke u bërë njëkohësisht një rrezik potencial për përhapjen e një sërë sëmundjesh të rrezikshme. Pas dyshimeve të denoncuara nga qytetarët, Gazeta “SOT” ka marrë kampionë të kësaj nafte në disa pika tregtimi dhe i ka nisur në Itali për analizim në një laborator të posaçëm. Rezultati i analizave do të botohet gjatë këtyre ditëve, ashtu siç do të deklarohet nga laboratori analizues. Kjo i takon në fakt të bëhet nga institucioni shtetëror përgjegjës, që në rastin konkret është Inspektoriati Qendror Teknik. Megjithatë, në mungesë të reagimit nga ky institucion, gazeta “SOT”, ka nisur punën për denoncimin e këtij skandali që po trondit xhepat, makinat, por dhe jetën e qytetarëve shqiptarë. \
IQT, subjekt kontrolli vetëm kompanitë anonime
Cilësia e dobët e karburantit që tregtohet në vend është bërë shpesh objekt debati. Ndërkohë fitimet e mira që merren nga ky lloj biznesi, ka bërë që gjatë viteve të fundit numri pikave të tregtimit të karburanti të rritet ndjeshëm, këto të vendosura në rruge nacionale, rurale, por edhe brenda qendrave të banuara. Në kuadër të masave për monitorimin e standardeve të cilësisë dhe tregtimit të hidrokarbureve, me propozim të Inspektoratit Qendror Teknik, ministri i Energjisë dhe Industrisë, Damian Gjiknuri, ka firmosur masën e pezullimit të aktivitetit tregtar të 37 shoqërive të tregtimit me shumicë të naftës, gazit dhe nënprodukteve të tyre. Sipas njoftimit zyrtar të këtij dikasteri, kontrollet e Inspektoratit Qendror Teknik janë përqendruar tek treguesit e cilësisë dhe sigurisë së tregtimit të naftës e gazit ashtu sikurse edhe tek respektimi i detyrimeve ligjore që subjektet tregtare kanë ndaj shtetit. Shoqëritë e tregtimit me shumicë, ndaj të cilave është marrë masa e pezullimit përbëjnë rreth 20% të totalit të këtyre shoqërive që ushtrojnë aktivitet në këtë fushë. Nga lista e publikuar nga MEI, vërehet se kompanitë e pezulluara janë thuajse anonime dhe pa peshë të konsiderueshme në treg. pezullimi i tyre duket më shumë si ndihmë e konsolidimit të biznesit për kompanitë e mëdha ekzistuese, se si goditje e kompanive që abuzojnë prej vitesh ndaj qytetarëve në cilësi dhe sasi. Edhe pse shpeshherë janë marrë masa ndaj subjekteve të ndryshme, si me gjoba apo dhe mbyllje aktiviteti përsëri cilësia e tregtimit të karburantit në vendin tonë lë për të dëshiruar, krahasuar me vendet e rajonit. Ndërsa, çmimet rezultojnë prej vitesh më të larta.
