Shqipëria nuk është mundësia e parë e pushuesve të zakonshëm rusë, por kriza e refugjatëve në Greqi dhe kërcënimet terroriste në Turqi mund të vënë në provë aftësitë e qeverisë shqiptare me turizmin.
Nga Fatjona Mejdini, BIRN
Qeveria shqiptare po shënjestron tregun e turistëve në Rusi në një kohë kur pushuesit rusë po kërkojnë alternativë nga destinacionet tradicionale si Turqia dhe Greqia.
Ideja është të shfrytëzohen problemet me të cilat përballen dy vendet si Turqia dhe Greqia, të cilat janë përfshirë nga kriza e refugjatëve dhe kur terrorizmi po bëhet gjithnjë e më i rrezikshëm në Turqi.
Drejtuesit e fushatës për të përfshirë Shqipërinë në hartën turistike të Rusisë është Agjencia Kombëtare Shqiptare e Turizmit, AKT, drejtori i të cilës, Ardit Çollaku i tha BIRN se një marrëdhënie e re po lidhet mes institucioneve shqiptare të turizmit dhe agjencive turistike në Rusi.
“Sapo jam kthyer nga një vizitë në Moskë dhe Kazan ku u takova me homologët e mi për të diskutuar turizmin. Rusët e vlerësojnë faktin se Shqipëria nuk është prekur nga kriza e refugjatëve dhe ne zbuluam se kishte një nivel të lartë interesi nga pala tjetër,” tha Çollaku.
Një delegacion i agjencive turistike ruse dhe shkrimtarëve të udhëtimeve pritet të vizitojë Shqipërinë në prill për të mësuar më shumë rreth potencialit turistik. “Delegacioni rus do të vijë brenda prillit dhe ne po përgatitemi,” tha Çollaku.
Drejtori i AKT shtoi se vendi gjithashtu fton biznesmenët rusë të vijnë dhe të investojnë në industrinë shqiptare të turizmit.
“Zyrtarët shqiptarë të turizmit në maj do të shkojnë në forumet ekonomike në Rusi, ndaj ne do të prezantojmë atje mundësitë e investimit në Shqipëri,” shtoi ai.
Për të stimuluar turizmin rus në 2014, Shqipëria hoqi regjimin e vizave me Rusinë për muajt e verës, nga 1 qershori deri më 1 tetor.
“Ne po i kërkojmë ministrisë së jashtme ta zgjasë këtë periudhë, meqë strategjia jonë është të krijojmë një sezon të vazhdueshëm dhe të qëndrueshëm të turizmit për një periudhë më të gjatë”, tha ai.
Megjithatë, kreu i AKT sheh vështirësi në krijimin e një marrëdhënie turistike me Rusinë për shkak të problemeve të fluturimeve direkte mes dy vendeve.
Matilda Naço, drejtore e Shoqatës Shqiptare të Turizmit, sheh se kapacitetet janë një tjetër problem në zonë. Ajo i tha BIRN se Shqipëria nuk ka kapacitet për t’u përballur me një “bum turistik” rus.
Ajo thotë se 1160 njësitë turistike të Shqipërisë kanë vetëm 40,000 shtretër, në një sistem shumë të fragmentizuar të akomodimit dhe theksoi se 80 për qind e hoteleve shqiptare kanë vetëm 20 deri në 40 dhoma.
“Shqipëria duhet të investojë në trajnimin e njerëzve që do të merren me turizmin dhe kjo është një detyrë shumë delikate dhe e rëndësishme,” u shpreh Naço.
“Sektori privat duhet të mbështetet fuqishëm në këtë përpjekje dhe qeveria duhet të krijojë një strategji më të detajuar rreth sfidave të turizmit, si për shembull sfidat që mund të përballemi me ardhjen e turistëve rusë”, përfundoi Naço.
