Ambasada Amerikane ka reaguar në faqen e saj zyrtare në Facebook për një çështje që lidhet me investimet e huaja në Shqipëri. “Në situatën ku ndodhemi sot, rrethanat në lidhje me hapësirën Pa Taksë (Duty Free) në Aeroportin Ndërkombëtar të Tiranës tregojnë sfidat me të cilat përballen investuesit e huaj në Shqipëri.
Është zhgënjyese që klima aktuale e biznesit pengon rritjen e investimeve të huaja. Shqipëria duhet të zbatojë rregulla të drejta dhe transparente në mënyrë të barabartë për të gjitha bizneset. Shpresojmë që qeveria e Shqipërisë të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme”.
Kjo është deklarata e Ambasadës Amerikane, e cila vetëm pak ditë më parë me përfaqësuesit e saj ishte pjesëmarrëse si vëzhguese në një çështje gjyqësore jo pak e rëndësishme.
Bëhej fjalë për një proces gjyqësor për një konflikt mes kompanisë Albania Duty Free Distribution, me pronare bashkëshorten e gjyqtarit Gjin Gjoni, Elona Çaushi dhe Ministrisë së Financave, për liçencën për ushtrimin e aktivitetit tregtar në ambientet Duty Free në Aeroportin e Rinasit.
Përfaqësuesit e Ministrisë së Financave, Avokaturës së Shtetit, Drejtorisë së Përgjithshme Doganave, kompanisë amerikane International Cruise Duty Free që ka fituar tenderin dhe të konçesionarit Tirana International Airport parashtruan konkluzionet para gjyqtarit Avni Sejdi, në mbështetje të vendimit të Financave për t’i anuluar autorizimin kompanisë së Elona Çaushit për ushtrimin e aktivitetit Duty Free.
Sipas tyre, ADFD-ja ka gënjyer kur ka aplikuar për liçencë, duke mos informuar ministrinë se kishte humbur tenderin që në shkurt të 2019 dhe i mbaronte kontrata me TIA-n për menaxhimin e dyqane Duty Free. Nga ana tjetrër, avokatët e çiftit Gjoni kërkuan rrëzimin e vendimit për anulimin e liçensës, e cila është vendimtare për kontrollin e dyqaneve në Rinas, për të cilat ADFD ka humbur tenderin si dhe i ka mbaruar kontrata që në 27 gusht 2019.
Kompania amerikane ICDF ka fituar tenderin dhe ka lidhur një kontratë me TIA që në korrik të 2019 për menaxhimin e ambienteve tregtare, të cilat sot i kontrollon familja Gjoni, përmes dy vendimeve paraprake të dy gjyqtarëve pa Vetting, Avni Sejdi dhe Mimoza Kajo Brahimi.
