Për herë të parë nënshkruhet një marrëveshje kulturore që përfshin Serbinë e Kosovën, Shqipërinë dhe Maqedoninë
Atë bashkëpunim që nuk po arrin dot ta bëjë politika dhe diplomacia zyrtare mes Beogradit dhe Prishtinës, e bëjnë realitet përfaqësuesit shqiptarë dhe serbë të kulturës dhe të shoqërisë civile në Gjirokastër. Dje ata kanë nënshkruar një marrëveshje që synon të ndërtojë një rrjet të përbashkët rajonal, ku përfshihen organizata kulturore nga Shqipëria, Serbia, Kosova dhe Maqedonia.
Ky rrjet i organizatave kulturore është promovuar në mbyllje të konferencës ndërkombëtare dyditore “Roli i kulturës në pjesëmarrjen qytetare dhe zhvillimin e komunitetit” organizuar nga Zyra e TASCO-s në Shqipëri, Fondacioni Gjirokastra dhe organizata Skena e Pavarur Kulturore me pjesëmarrje të rreth 80 përfaqësuesve të fushës së kulturës, trashëgimisë kulturore material dhe shpirtërore, të komuniteteve fetare, të rretheve akademike, medias dhe biznesit nga përfaqësues nga vende të ndryshme të Ballkanit Perëndimor.
Kosovari Florent Mehmeti përfaqësues i Forumit Kulturor të Kosovës dhe serbi Aleksandar Djeric përfaqësues i Forumit ACADEMICA Grup nga Beogradi, së bashku me maqedonasen Violeta Simjanovska drejtore ekzekutive e organizatës PAC Multimedia dhe Andi Tepelena i Skenës së Pavarur Kulturore vendosën firmat e tyre në të njëjtin dokument që i hap rrugën dialogut sistematik ndërkulturor për zhvillimin e politikave të përbashkëta pjesëmarrëse në fushën e kulturës dhe trashëgimisë. “Zgjodhëm qytetin e Gjirokastrës si vendin më të përshtatshëm për organizimin e konferencës ndërkombëtare “Roli i kulturës në pjesëmarrjen qytetare dhe zhvillimin e komunitetit”, jo vetëm sepse është një qytet që është pasuri kulturore botërore e mbrojtur nga UNESCO, por edhe për faktin se ky qytet është cilësuar si një diamant ballkanik në bashkëjetesën e kulturave, besimeve dhe etnive të ndryshme”, tha pas nënshkrimit të dokumentit të përbashkët “Memorandum of Understanding”, Genc Pasko, drejtor i Projektit TASCO për Shqipërinë.
Ndërsa përfaqësuesi serb në këtë konferencë, drejtuesi i Forumit ACADEMICA Grup nga Beogradi, zoti Aleksandar Djeric u shpreh se: “Duke nënshkruar këtë Memorandum Mirëkuptimi, ne angazhohemi bashkërisht për të vendosur kulturën dhe trashëgiminë e popujve tanë në një kontekst sa më real, për të lehtësuar sa më shumë ndërveprimin dhe komunikimin midis grupeve kulturore dhe komuniteteve, për ndërtimin dhe institucionalizimin e një rrjeti rajonal të komunikimit ndërkulturor i cili do të nxitë afrimin e komuniteteve dhe përdorimin e kulturës si mundësi për zhvillimin e tyre ekonomik dhe social”. Nënshkrimi i memorandumit mes katër përfaqësuesve të subjekteve kulturore, sidomos nënshkrimi në të njëjtin dokument nga përfaqësuesit e Serbisë dhe Kosovës u shoqërua me duartrokitje nga të pranishmit, ndërkohë që vetë nënshkruesit bashkuan duart në shenjë solidariteti dhe përçimi të një mesazhi bashkëpunimi ndërkulturor si sfidë ndaj politikës ndarëse dhe konfliktuale të qeveritarëve në të dyja anët e kufirit.
Presidenti i Forumit Kulturor të Kosovës, aktori dhe regjisori Florent Mehmeti tha se: “Duke përjetuar përditë e më tepër rënien e kufijve për qarkullimin e lirshëm të kulturave në rajonin tonë, ne jemi duke u angazhuar në krijimin e një rrjeti të përbashkët, i cili si një zë të vetëm do të nxitë dhe promovojë kulturat dhe trashëgimitë tona, me vlerat e përbashkëta dhe me veçoritë dhe larmitë kulturore që përbëjnë një pasuri të çmuar dhe origjinale për popujt e ndryshëm që bashkëjetojnë në rajonin e Ballkanit”. Finalizimi i konferencës ndërkombëtare dyditore “Roli i kulturës në pjesëmarrjen qytetare dhe zhvillimin e komunitetit” organizuar nga zyra e TASCO-s në Shqipëri, me nënshkrimin e këtij dokumenti që formalizon krijimin e një rrjeti rajonal të organizatave kulturore, shënon një sukses për komponentin “People to People” të asistencës teknike për organizatat e shoqërisë civile të mbështetur dhe financuar nga Bashkimi Europian.
